TURA: West Jaintia Hills a·jani Mukroh songo a·sel ong·anichi Garo Hills-o ong·atna manchisogimin Me·gong Festival-ko Meghalaya sorkari dontongatpilani ja·man da·o ia apsan program-ko dingtang bimango ong·atskaani cholrang dongenga.
Ia Me·gong Festival-o dokkanrangko dakna sienggipa aro dingtang dingtang program-rango bak ra·na sienggipa manderangni koros ka·samsoanirangko aro neng·skimanirangko ma·siani ja·man Budbar salo, Garo Hills-ni adita sak dilgiparang, Meghalaya a·dokni Chief Minister Conrad K Sangma aro Chief Minister-ni Advisor Thomas A Sangma-ko grongeani ja·man, iani bidingo kobor ra·timgiparangna parakataha.
Chief Minister-ko grongdilegipa dilgiparangoni saksa aro NGO-rangni gitcham dilgipa Sengrak D Marak-ni kobor ra·timgiparangna parakatani gitade, ia Me·gong Festival-ko dingtang bimango ong·atanio sorkari maming jak dongjawaha aro ia program-ko manderangni nangnikengani gimin dingtang dake ong·atskachina a·dokni Chief Minister pakwate on·angaha.
“Da·al salni bako chinga skanggipa Chief Minister-ni advisor aro North Tura-ni MLA Thomas A Sangma-ko grongeani ja·man a·dokni Chief Minister Conrad Sangma-koba gronge, ia festival-ko ong·atani bidingo agangrikeaha aro ia program-ko dingtang bimango event management baksa nangrime ong·atna gita chingna pakwate on·angaha. Uni gimin ia program-ko chinga manderangni nangnikani gita dingtang bimango ong·atna tik ka·aha aro da·o event management baksa agangrikengkua. Haida salbongarangni gisepon chinga ia program-ni gimin talbate u·iatna man·naba gnang indiba ia program-o sorkarini maming bak dongjawaha,” ine Marak parakataha.
Marak-ni parakatani gitade, Garo Hills-ni bang·a manderangan ‘Michael Learns To Rock’ (MLTR) dolko nina ka·donge nichaksotokengani gimin ia dolko rimbana gita uamang jotton ka·enga aro da·o December-ni 12 tariko MLTR dol Garo Hills-ona re·bapilani cholrang dongengani gimin ia program-ko December-ni 12 aro 13 tarikrango apsan Baljek Airport-o ong·atangkunaba gnang.
“A·bachengo u·iatsogimin gitan ia program-o an·ching Garo Hills-ni dingtang dingtang mingsing minggamgipa dolrang, jekai Riprap, Rough Road, Da Suraka aro uandakgipa dolrangkoba nikangna man·gen aro chingni ka·dongsoengani gitade MLTR dolba December-ni 12 tariko re·bae gitrangko ring·anggen,” ine Marak parakataha.
Re·anggipa November-ni 22 tariko Jaintia Hills a·jani Mukroh songo a·sel ong·ani ja·man a·dok sorkari, a·doko ong·atenggipa pilak program aro manianirangkon dontongatpilahachim aro uandaken Garo Hills-o dal·batsranggipa festival-rangoni mingsa ‘Me·gong Festival’-koba sorkari dontongatpilahani gimin ia manianiko dingtang dake ong·atskana miksongengachim.