TURA: Mitam manderang, Pradhan Mantri Awas Yojana (PMAY)-ni ning·o nokrangko rikmanpilahaoba Conrad Sangma-chi dilenggipa MDA sorkari, ia manderangna scheme-ni tangka paisarangko gamkujaenga ine Tura-ni MDC aro BJP-ni state vice president Bernard N Marak matnangataha.
Marak-ni parakatani gitade, ia PMAY nokrangko rikna gita 2016 bilsion sanction ka·ahachim aro da·o ia nokrangko rikmanpilahaoba a·dok sorkari, ia manderangna bangki tangkarangko gamskakujaengachim.
“Iandake PMAY-ni tangka paisarangko MDA sorkarini on·na gisik nangjaenganiara, a·songni Prime Minister Narendra Modi aro BJP-ni bimingkosa ong·gija dake man·atskaenga,” ine Marak parakataha.
Tura MDC-ni parakatani gitade, uko pattokoni watpilani ja·man, PMAY-ni nokrangko rikmangipa mitam manderang uona re·bae iani bidingo badi ka·etokaha aro ia manderangni una aganani gitade, election-o NPP-na pu·one bilona watatpilgenchimosa ia tangka paisarangko uamangna on·naba gnang.
“Iani bidingo anga office-oniko am·sandion, sorkarioni saobasa tangka paisarangko gamna on·gija dongenga ine ma·sina man·aha. Ian ma·mong sorkarini kangal cholgrirangna on·enggipa cholrangko a·dok sorkarini ra·e katna jotton ka·aniko mesokani ong·enga,” ine Marak parakataha.
Mitam chatro chatrirang da·onan an·tangtangni scholarship-rangko man·tokkujaengani gimin an·tangni suk ong·gijaniko parakatskaengon, ia chatro chatrirangni neng·nikanirangko a·dok sorkari ta·raken namatna nanga ine Meghalaya BJP-ni state vice president dabiangaha.
Garo Hills-o skul nokrang namsrangjaengani gimin aro skigiparangko chu·onga gita on·jaengani giminba ua an·tangni suk ong·gijaniko parakataha.
