SHILLONG: Assam a·dok baksa nangchapgipa Meghalaya a·dokni simarango police outpost-rangko songna a·dok sorkarini tik ka·aniara manderangni mikkango dakmikanisan ong·aia ine Meghalaya a·dokni Trinamool Congress (TMC) dol matnangataha.
Simarango police outpost-rangko songna ku·rachakaniko sorkari chu·sokatbebegenma ine Opposition TMC-ni dilgipa Mukul Sangma sing·doataha.
“Police outpost-rangko songbebegenma na·simang sorkariko sing·e niahama? Police outpost-rangko songna aro outpost-rangko bilakbatatna gita kam ka·gipa manderangko nangdapjawama?” ine Sangma sing·doangaha.
Police dolo napna sikenggipa chadamberangko miksongmanchaen kamo ra·jaenga ine a·dok sorkariko matnangatengon, “2016, 2017 aro 2019 bilsirango advertise ka·gipa kamrangna hajalni hajal chadamberang dorgastorangko galahachim indiba da·alonan ia kamrangko gapatkujaenga,” ine TMC-ni dilgipa parakataha.
South Garo Hills a·jao mande rim·gittangani somoio Nongalbibra police station-o chu·onga gita sipairang dongjani a·selan police-rang, dos dakgipa mandeko rikangna man·jaha ineba ua toe janapataha.
Police department-o bangbang ong·e dongenggipa kamrang indita bilsirangni ja·man bariroroangaha aro mitam kamrangkode Elite SF-10-ni commando-rangko ra·jitange gapatskaaha ineba Sangma parakataha.
“Special Force (SF-10) battalion-kode, bobil dake chakatgipa dolrangko warachakna miksonganiosa bikotachim indiba sorkari, ia sipairangko gipin district force-rangosa donatskaaha. Ia sorkari, chadamberangna miksongmanchaen kamrangko on·jaenga maina uamang, chadamberangna on·gipa dormaharangko an·tangtangsa ra·e katna miksonganirang donga,” ine Opposition dolni dilgipa aganaha.
