Ampati: A·gilsak gimiko International Day for Persons with Disabilities (PWDs)-ko maniangon, South West Garo Hills-ni Gandhipara songo dingtang dingtang songsarrangna dangdike ong·giparang baksa nama bewalo Sonibar salo maniangaha. Manianiko ia bilsio, “A·gilsak gimiko apsangrik ong·aniko ra·bana aro nanganirangna bosturangko bikotani kamrangko namroroanio man·chapatna dingtangtegipa namataniko ra·bana,” ine pangchakaniko donaha. Ia programme-ko District Social Welfare Office baksanaba Supervisor-rang, CBIW-rang aro Anganwadi Worker-rang apsan nangrime ong·ataha.
Maniani bako, PWD-rangna smart phone-rang, jaksikepe re·gipa goldikrang, wheelchair-rang baksa samrang aro nanga bosturangko Ms.A.V.D. Shira, ADC i/c Social Welfare Department-ni Ma. A.V.D Shira aro gipin official-rangchi on·angaha aro manianio PWD-rangna dingtang dingtang kal·susaanirangko ong·atangaha aro chegiparangna bara pinaniko boksis dake suale on·angjolaha.
Sakantian dingtang dingtang dakgipa be·en bimangni gita komianirang donga aro be·en bimangni gita komigipa sakantian changa sapanirang baksa atchikapgiparang donga ine Ma. A.V.D Shira mongsonggipa sokgipa ong·e aganangaha. Da·al sal, dingtangmanchagipa sal ong·enga jeon uamangni bilko aro changa sapaniko ma·si manienga, ine ua agandapangaha. PWD-rang jemangan songsar aro nokdangni gita kangal cha·a sia indakgipa nokdangrangna tangka paisarangchi pilak dakchakanirangko man·anggen ine ua agandapangaha.
PWD-rangni salantio cha·a ring·ani aro ranta ka·jringanirangko dakna nangani aro uamangni gisik an·sengbaljokanirangko man·chape Medical & Health Officer i/c Garobadha CHC, Dr. Timchida Marak-chi kan·dike agan-talataniko dakangaha.
South West Garo Hills-ni Rongsepgre songoni bilsi 26 ong·gipa mikron nikgijagipa Klingson Marak, international robol kal·susagipa ong·a, ua Indian Blind Football Federation-o Indian Blind Footbal team-ni gitcham captain-ba ong·achim. Ua a·gilsak gimiko bang·a international kal·susaanirango bakko ra·angaha. Mjamangmang ua Asian Championship-o kal·angaha aro ua Paralympic-o kal·anggen jean re·baenggipa bilsio CHina a·songo ong·atanggen. Manianio, ua PWD-rangna be·en bimangni gita neng·nikanirangko pasike dongjachina didiani kattarangko aganangaha.
Rongbakgre songoni bilsi 24 ong·gipa mikron nikgijagipa Jebilbang M Sangma, Indian Blind Footbal Federation-o International Footbal kal·susaangaha. Uaba international kal·susaanirango kal·angaha. International Day for Persons with Disabilities-ko maniani somoio, uamangni bi·sarangna ka·sa ma·gipa pagiparang jemangan dingtang dingtangni neng·nikrangko man·genoba maming sinjetani gri dal·atgipa ma·gipa pagiparangna ua gitko tairangaha.
