SHILLONG: Re·baenggipa 2023 bilsini Assembly election-o Meghalaya a·dokni Trinamool Congress (TMC) dol, seat dambongakoba chejawa ine National People’s Party (NPP)-ni national president aro a·dokni Chief Minister Conrad K Sangma parakataha.
NPP-ni survey ka·ani gitade NPP dol, Garo Hills jolrango donggipa gimik dam 24 constituency-rangoni seat dambongana bate chena man·jawa ine adita salrangna skang Opposition TMC dolni dilgipa Mukul Sangma aganahani gimin NPP-ni national president, ia kattarangko aganskaaha.
“Jeba kattarangkode agane rona man·aia. Ian uni (Mukul)-ni agansamsoanisa ong·enga aro haida ua TMC-ni giminsa agansamsoengakon. Uamangde indita seat-rangkoba chegenma chejawa anga an·tangde ma·sija. Uni gimin election-ni ja·man an·ching ma·siaigen,” ine Chief Minister aganaha.
Garo Hills-ni a·kawe jolrangko NPP-ni salgopna miksongenggipani bidingo janapatskaengon, “Chinga iako chu·sokatna kam ka·gen aro man·a dipetde chinga a·dokni pilak biaprangon seat-rangko chena jotton ka·gen,” ine Sangma parakataha.
Election-rangara altua kam ong·ja ineba ua agantaiaha.
“Anga pangnan iako aganronga aro da·oba aganenga, election-o susaaniara maming dakeba altugipa kam ong·ja. An·ching darangba ong·gniko agansamsona man·ja aro mamingkon altuaie ra·na man·ja,” ine NPP-ni national president aganaha.
Chegipa ong·na gitade pangnan kamko rake ka·na nanga ineba a·dokni Chief Minister parakataha.
“Anga pangnan angni dolni manderangko altuae ra·jachina aganronga. Chinga rakbee kamrangko ka·gen aro chinga darangkoba altuae ra·jawa,” ine Sangma aganaha.
