SHILLONG: Re·anggipa November-ni 22 tariko a·sel ong·angani ja·man da·o adita tom·tomanirangko man·pilengahaoba, West Jaintia Hills a·jani Mukroh songo songdongenggipa manderang maming naljokani gri ong·e kenchipchipe dongna nangtokkuenga ine u·iataha.
Mukroh songni ja·delgipa mande saksani kobor ra·timgipa manderangna parakatani gitade, ia songo te 400-mangni gita nokdangrangan a·a pattarang donggipa ong·achim indiba songni manderang, an·tangtangni a·arangko register ka·na Jaintia Hills Autonomous District Council (JHADC)-ona re·angon, ia kamko ru·utatesa donrongaiachim.
“Ia songni bang·bata manderangan kangal cholgrirangsa ong·a indiba songni manderangoniko uamang form-mangmangnaba tangka paisarangko bi·ronga. Council-ni officer-rang a·a tona re·baoba uamangna tangka paisarangko gamna nanga. Iandake a·arangko register ka·anio ru·utatako man·engani a·selan Karbi Anglong-ni manderang, a·arangko ra·sekna cholrangko ra·skaenga,” ine songni mande saksa aganaha.
Ia jolo donggipa pilak buring bolgrimrangkoba JHADC-on register ka·ahachim aro ia neng·nikaniko JHADC-ni dilgiparang, Karbi Anglong Autonomous Council baksa agangrike namatna man·genchimoba maming ja·kurangkon de·jaenga ineba ua parakataha.
Mukroh songo police outpost dongani maming namgnian dongja maina ia jolrango songdongenggipa manderangko Karbi Anglong-ni forest guard-rangan dokkol ka·e rona jotton ka·ronga ineba songni manderang parakataha.
Mukroh songoni sepangbatgipa anti cha·ram biapara Mokoilum songan ong·a aro ia songko Assam-ni ning·o ine a·kangengoba ian Meghalaya a·dokni ning·on ga·akachim ineba songni manderang parakataha.