SHILLONG: Meghalaya a·doko IAS officer D Vijay Kumar-chi dilenggipa Meghalaya Eco-tourism Infrastructure Development Project (MEIDP)-ni ning·o gong kror 632 tangkarangko jakkalsretaha ine Trinamool Congress (TMC) matnangataha.
TMC-ni national spokesperson Saket Gokhale-ni parakatani gitade, Chief Minister Conrad Sangma-ni mongsonggipa manderangoni saksa Vijay Kumar-chi dilenggipa Meghalayan Age company-ni ning·o ia tangka paisarangko jakkalsretahachim.
Ia Meghalayan Age Limited company-ara 2020 bilsio a·bachengatgipa aro sorkarichi chalaienggipa company ong·achim aro ian MEIDP-ni kamrangko jako ra·gipa ong·e, iana New Development Bank (NDB)-oniko gong kror 632 tangkarangko Meghalaya sorkari, loan ra·ahachim ine Gokhale parakataha.
“Ia MEIDP-ni bak gita gong krorni kror ong·gipa adita project-rangko sorkari parakataha aro ia project-rangna tender aro0 RFP-rangkoba on·aha. Tender-rangko Meghalaya Age Ltd-sa on·ahani gimin ia tender-rangni chu·gimik detail-ko manderangna parakjaha aro ia tender-rangko on·ani aro tender man·gipa contractor-rangni bimingrangkoba parakgija sriksriksa dakaiaha,” ine TMC-ni dilgipa parakataha.
MEIPD-ni ning·o ga·akgipa project-rangara ramarangko tariani kamrangsa ong·ani gimin PWD (Roads)-ni ning·osa ga·akachim indiba ia kamrangko Meghalayan Age Ltd-sa jako ra·skaenga ineba Gokhale parakataha.
“Bang·bata rama tariani project-rangkon joltangni contractor-rangna on·ani pal ia sorkari, Badri Rai & Company aro uandakgipa sorkarini mikkang nitegipa contractor aro company-rangnasa on·aha aro ia kamrango bang·en tangka paisa jakkalsretaniko nikna man·aha,” ine Gokhale parakataha.
2020 bilsionin Meghalayan Age Ltd company,Corporate Affairs Ministry-na financial report-rangko on·na dongkuja aro indita krorni kror ong·gipa project-rangko on·anio maming parakani dongjaha ineba ua matnangataha.
Indake ong·engon, Meghalata sorkari, Meghalayan Age Ltd, a·dokni Chief Minister aro sorkari officer-rangni kosako TMC-ni iandake matnanganiko Meghalaya sorkari raken jegalatskaaha aro uni matnanganirangara maming pangchakani grigipasan ong·aia ine parakatskaaha.
