SHILLONG: Mowkaiaw constituency-ni MLA Nujorki Sungoh-ni indita changni chang mikraksamsoataniko a·dok sorkari knachake, nanga gita ja·kurangko de·genchimode, Mukroh songo ong·gipa a·selko champengna man·genchim ine United Democratic Party (UDP) parakataha.
UDP-ni general secretary Jemino Mawthoh-ni parakatani gitade, Assam-ni sima jolo songdongenggipa Meghalaya a·dokni manderangko Assam police-rangni dokkol ka·e roani bidingo Mowkaiaw constituency-ni MLA changni chang a·dok sorkarina u·iatahachim indiba MLA-ni mikrakatanirangko a·dok sorkari knachakna gisik nangjahachim.
“UDP aro MLA-ni ku·rangko sorkari knachakgenchim ong·ode nanga gita ja·kurangko de·samsoe, Mukroh songo ong·gipa a·selko champengna man·genchim,” ine Mawthoh janapatenba, iani bidingo Mowkaiaw MLA, adita salrangna skang ong·atanggipa Assembly Session-oba ku·rang on·ahachim ine parakataha.
Assam a·dokni simarango songdongenggipa manderangna naljokaniko on·na man·na gita a·dok sorkari, mikrake kamko ka·na nangengaha ineba ua parakataha.
Ia jolrango songdongenggipa manderangna chel·chakaniko aro ka·donganiko on·na man·na gita ia sima jolrango nanga gita sipai dolrangko donatchinaba ua sorkarina ku·pattianiko on·angaha.
Mukroh songo dosgri manderangko so·otgalani ja·man a·dokni Home Minister Lahkmen Rymbui-ko kam watchina dabitokgipani bidingo janapatengon, iani bidingo UDP-ni dilgiparang chanchirimaha aro Home Minister-ko kam watchina dabianiara kraani ong·ja ine jegaltokaha ine UDP-ni general secretary parakataha.
Ia a·selni bidingo politics kal·jachina gitaba ua doltangni membor-rangko didiataha.
“UDP-ni mitam dilgiparang, home minister-ko kam watchina nangniktokahachim indiba chinga pilakni gitan nigope iani bidingo chanchirimaha aro ian kraani ong·ja,” ine Mawthoh parakataha.
