Jengjal-o a·songni skanggipa Drone Delivery Hub-ko kulia

TURA: Re·anggipa Sombar salo, India a·songni skanggipa Drone Delivery Hub aro Network-ko, a·dokni Health Minister James PK Sangma-ni jakchi, Jengjal Civil Sub-Division-o kulie on·angaha.
Ia Drone Delivery Hub aro Network-ko kulina gita World Bank, tangka paisarangko dakchake on·aha aro ia Drone Delivery Hub-ko kuliani miksonganiara nangenggipa biaprangona samrangko, sample-rangko, tikarangko, an·chirangko aro dingtang dingtang nangchongmotgipa bosturangko ta·rakbate sokate on·na miksonganian ong·enga.
Ia Drone Delivery Hub aro Network-ko kulie on·angani somoio jolni MLA aro a·dokni Health Minister James Sangma, jinmana aganprakangengon, a·songni skanggipa Drone delivery hub-ko Jengjal-o kulina man·ahani gimin an·tangni kusi ong·aniko parakangenba, ia drone delivery hub-o Jengjal Sub-Divisional Hospital-oni Pedaldoba PHC-ona minute 30 nanggijan, samrangko aro pilak nangchongmotgipa bosturangko sokate on·na man·gnok ine parakataha.
Jengjal-oni Pedaldoba-ona gari gorarango re·genchimode komibeoba konta bongamangko nangrongaiachim indiba ia drone delivery hub-ko kulianichi, Pedaldoba PHC-ona sam, an·chi, sample aro uandakgipa nangchongmotgipa bosturangko bakan sokate on·na man·gnok ine Sangma aganaha.
Ia drone-o komibeoba kg 3-oni kg 5 bosturangko ra·na man·achim.