SHILLONG: Meghalaya a·doko kajinarangko man·ani cholrang komiengani a·sel tangka paisani gita neng·nikanirangko man·na nangengon, gipin a·dokrango election-rangko ong·atanio Conrad K Sangma-chi dilenggipa National People’s Party (NPP)-ni krorni kror tangka paisarangko jakkalskaengani gimin baoni indita tangkarangko jakkalna man·enga ine Meghalaya a·dokni BJP dol sing·doatskaaha.
“Batanggimin somoirango, Arunachal, Nagaland, Manipur, Goa, Sikkim aro uandakgipa biaprango election-ko ong·aton, candidate-rangko susaatenba gong krorni kror tangkarangko NPP jakkalaha. Ia tangkarangara Meghalaya a·dokoni ong·jaode baoni re·baenga?” ine BJP-ni MLA AL Hek sing·doataha.
Meghalaya gita tangka paisana neng·nikanirangko man·enggipa a·dokoni gipin a·dokrango ong·atenggipa election-rango krorni kror tangkarangko jakkalaniara namen ong·na amgijani ong·a ineba ua aganaha.
Election-rangna krorni kror tangkarangko jakkalengani gimin NPP-ko sing·doatengon, “Meghalaya a·doko bano an·ching karkanarang donga? Indakgipa political dolna sawa tangka paisarangko indita dakchake on·na man·gen? Indide ia tangka paisarangara baoni re·baenga?” ine BJP-ni dilgipa sing·doataha.
Meghalaya a·dokni political party, a·songni pilak biaprangon election-rango susaenga ong·ode, tangka paisarangko jakkalani bidingo chanchichipna kraatani ong·a ineba Hek parakataha.
A·dokni Chief Minister Conrad Sangma, NPP dolko Meghalaya a·dokosan ong·aigija salgro salaramni pilak a·dokrangon gipatna rakbee kamko ka·engachim aro da·o ua Tripura aro Karnataka a·dokrangoba susaatna miksonganirang dongengachim.