TURA: Pa Togan Nengminja Sangma-ni chang 150-gipa siani salko Chisobibra-ni Togan Memorial Park-o maniangaha aro ia salko manianio a·dokni Chief Minister Conrad K Sangma, mongsonggipa sokgipa ong·e bakko ra·angaha.
Pa Togan Nengminjani siani salko manianio a·dokni Chief Minister, jinmana aganprakangengon, Pa Togan Nengminja-ni ka·dongbee British sipairangko warachaksoanio janggitangko gimaatna nangahani gimin jinmana gisik ra·atpilaniko on·angenba, a·dok aro a·songo songdongenggipa manderangni namgnina on·gilanirangko dakaniara a·songo songdongenggipa mande sakantini daitoan ong·a ine parakataha.
A·dokni matgrikrangko gisiktangtango tange rakkienba, gital chasongni manderangna u·iatrikrikskaaniara a·doko songdongenggipa mande sakantini daitoan ong·a ineba ua aganaha.
“Iandakgipa program-rangko ong·atanichin an·ching an·chingni jakgitelanina krengdilgipa manderangko gisiktangtango rakkie uamangni an·chingna on·gilanggipa kamrangna uamangko mande ra·pilskana gita man·a,” ine Sangma aganaha.
Meghalaya a·doko jakgitelanina krengdilanggipa manderangni gimin chadamberangna u·iatna gita dingtangmancha dingtang dingtang jatrangni gisepo program-rangko ong·atjringchina gitaba ua didiangaha.
Chisobibra-o donggipa Pa Togan Nengminja Sangma Memorial Park-ko a·dok sorkari nambate taridapna sienga ine talataniko on·angengon, iana sorkari gong lak 50-ko chamatmanaha aro kamrangko bakan a·bachengatgnok ine Chief Minister parakataha.
Ia salko manianio Pa Togan Nengminja Sangma-ko gisik ra·na tarigipa postage stamp-koba a·dokni Chief Minister aro gipin dilgiparangni jakchi oprake on·angjolaha.
Pa Togan Nengminjani chang 150-gipa siani salko Chisobibra-o mania
Date:
Share post: