AMPATI: Re·anggipa Sukrobar walo, South West Garo Hills a·jani police-rang, gong lak 1.5-ni drugs ba pekatgipa samrangko Ampati samba joloniko man·aha.
Police-rangni u·iatani gitade, South West Garo Hills a·jani Ichaguri-Betasing ramao pekatgipa samrangko badingsrukna sienga ine koborko man·soenba, Ampati Police-ni Anti Narcotics Task Force (ANTF)-ni official-rang, Shakil Miah minggipa mande baksana AS-34 3138 motorcycle-ko rim·sona man·aha. Ia mandeoniko ANTF-ni sipairang am·sandion, heroin ong·na nanga ine chanchichipenggipa powder-ko plastic bag-o katipgipa sabon bakos ge·doko man·aha.
Ia samrangko toe nion ia samrangni jreani gram 79-mang ong·achim.
Ia powder-ko ja·mano porikka ra·e nion, ian gong lak 1.5 ong·gipa heroin sam ong·a ine ANTF-ni official-rang ma·sina man·aha.