M’laya a·doko skanggipa Cancer Care-na MoU-o soi ka·grika

SHILLONG: Meghalaya a·doko skanggipa Cancer Care-ko kulina gita Budbar salo, Meghalaya sorkari aro Apollo Telehealth Foundation, Memorandum of Understanding (MoU)-o soi ka·grikangaha.
Ia soi ka·grikanio a·dokni Chief Minister Conrad K Sangma, tom·anio bak ra·giparangna aganprakengon, skangonin a·doko sanna bananirangko on·anio neng·nikanirangko man·na nangengani gimin iandakgipa Cancer Care-ko kulina cholko man·enganiara a·dokna bang·en namgni ong·gnok ine parakangaha.
“A·doko Cancer gita dakgipa sabisiko manderang bang·en man·tokengani gimin a·doko Cancer Care-ko kulianiara a·dokni manderangna dakchakani ong·gnok,” ine ua aganaha.
An·seng baljokaniko on·ani kamrangna a·dok sorkari, bang·en tangka paisarangko koros ka·aha ineba Chief Minister parakataha.
“Sanna banani kamrango bang·en neng·nikanirangko chagrongna nangenga indiba ia neng·nikanirangko namatna gita chinga rakbee kamrangko ka·enga. Iandakgipa neng·nikanirangko namatna Health department-san kamko ka·enga ong·ja indiba manderangna an·seng baljokaniko on·na gita sorkari mongsonggipa daito ong·ate kamko ka·enga,” ine Sangma aganaha.
Ia project-ara a·songo skanggipa project ong·engani gimin ian Meghalaya a·dokonasan gamchatgipa ong·enga ong·ja indiba ian a·song gimiknan dakmesokani gita ong·enga ineba Chief Minister parakataha.
“World Economic Forum aro Apollo Healthcare gita dakgipa dolrangni jak on·paanichi ian Cancer sabisiko bang·e man·enggipa Meghalaya a·doknasan ong·agija a·song gimiknan namgni ong·gen,” ine ua aganaha.
Manderangni janggirangko jokatna gisiko done, ia project-o bak ong·enggipa pilak dolrangkon rake kamko ka·china gitaba ua didiangaha.