TURA: Meghalaya a·dokni gital chief minister, Bharatiya Janata Party (BJP)-oni ong·gen ine Sonibar salo, Assam-o BJP-na ku·wattimenggipa Rupam Goswami a·kangataha.
Sonibar attamchibara, BJP-ni tom·bimonganiko North Garo Hills a·jani Resubelpara Jongla kal·chakramo ong·atanio ua ia kattarangko aganaha.
“Ma·mongo BJP dolsa sorkariko chalaiengani gimin Meghalaya a·dokoba BJP bilona re·bagenchimosa namroro silroroani scheme-rangde na·simangona joljol re·bagen. Manderangni neng·nikanirangko chagrongengmiting somoirango Prime Minister Narendra Modi-ni dilanichi BJP dolmangmangsan dakchakanirangko on·enga. Na·simangona namroro silroroaniko ra·bana ma·mong sorkaride pilak kamrangkon ka·enga, uni gimin iandakgipa namgnirangko man·na sikenga ong·ode na·simang BJP-ko seokna nangenga,” ine Goswami aganaha.
Batanggimin jagittimni gisepo ua baditaba chang Meghalaya a·dokni dingtang dingtang biaprangona wenbaaha aro a·dokni bang·a biaprangon rama jal·langrangni namgijako nikna man·aha ineba BJP-ni dilgipa matnangataha.
“Kilometre 30-ni ramakon kontagnina songrena nangenga indide iara mai dakgipa namroro silroroani ong·engaha? BJP-chi dilenggipa chingni (Assam) a·dok baksa tosusae niatbo. Assam-ode salantian gita dake rama jal·langrangko taridapenga, uni gimin iandakgipa namroro silroroani kamrangko nikna sikenga ong·ode chingko seoke nibo, unon na·simang dingtanganiko nikgen,” ine Goswami aganaha.
Ia chang Assembly election-o BJP chegipa ong·e gital sorkariko rikgen ineba ua an·tangni ka·dongsoenganiko parakataha.