PM Modi a·dokona sokbaa, NEC-ni golden jubilee-ko manianio bak ra·a

SHILLONG: India a·songni Prime Minister Narendra Modi, mijal Robibar pringo Meghalaya a·dokni skotong Shillong songjinmaona sokbaaha aro uko Union DoNER Minister G Kishan Reddy, Meghalaya a·dokni Chief Minister Conrad K Sangma aro gipin dilgiparang rimchaksoaha.
Shillong-ona sokbaani ja·man a·songni Prime Minister, North Eastern Council (NEC)-ni golden jubilee ba bilsi 50 gapaniko manianio bakko ra·angaha, jeon ua salgro salaram jolrangna mingchet pangchakani krongrangko parakangaha.
NEC-ni tom·bimonganiko ong·atanio Union Home Minister Amit Shah, Union DoNER Minister Kishan Reddy Gangapuram, Union Minister Kiren Rijiju, Union Minister Sarbananda Sonowal, a·dokni Chief Minister Conrad K Sangma aro dingtang dingtang dilgiparangba bakko ra·angtokaha.
NEC-ni bilsi 50 gapaniko manianio a·songni Prime Minister Narendra Modi, jinmana aganprakangengon, salgro salaram a·dokrango tom·tomaniko ra·bana, bijolirangko nambate on·na, Tourism-ko tang·doatna, jatni daka rikanirangko tang·doatna, rama jal·langrangko nambatatna, 5G network-ko ra·bana, gama ge·ani kamrangko tang·doatna aro kal·susaanirangko namdapatna sorkari kam ka·enga ine parakataha.
Salgro salaram a·dokrango namroro silroroaniko ra·bana kamrangko ka·engani gimin NEC-ko mittelpilangengon, salgro salaram a·dokrangara a·song gimikna gam-jinko ra·bagipa mite gita ong·a ine Prime Minister, salgro salaram a·dokrangko ‘Asht Lakshmi’ baksa toe aganangaha.
‘Look East’ policy-ko ‘Act East’ policy-ona dingtangatgipani gimin janapatengon, salgro salaram jolrango ta·rakbate namroro silroroaniko ra·bana gita ma·mong sorkari da·o ‘Act Fast for Northeast’ aro ‘Act First for Northeast’ policy-ko ra·gatskaaha ine Prime Minister Modi parakataha.
Salgro salaram a·dokrangara South-East Asia-ona cholguga gita ong·ani gimin a·songni pilak jolrangon namroro silroroaniko ra·bana bijangchi gita ong·enga aro ia cholko ra·e sorkari, India-Myanmar-Thailand a·song damgittamko nangdimeatgipa rama aro Agartala-Akhaura rel ramarangko tarina a·bachengataha ineba Prime Minister parakataha.