TURA: Budbar salo, Meghalaya a·dokni Chief Minister Conrad K Sangma, West Garo Hills a·jani Batabari C&RD Block-ko nokdonggae on·angaha aro ia gital block-ko nokdonggae on·angani somoio Rajabala constituency-ni MLA Abdus Saleh-ba dongpae bak ra·angaha.
Batabari C&RD Block-ko nokdonggae on·angani somoio a·dokni Chief Minister, jinmana aganprakangengon, Batabari jolo songdongenggipa manderangni ru·utbea bilsirangna dabienganiko chu·sokate on·na man·aha ine an·tangni kusi ong·aniko parakangenba, ia gital block-ko kulianichi jolni manderangna sorkarini kamrangko sepangbatatna man·gnok ine parakataha.
“A·dokni diltubatsranggipa biaprango songdongenggipa manderangnaba sorkarini a·bachengatgipa kamrangko sokate on·na ia sorkari kam ka·enga aro ia gital block-ko kulianichi sorkarini dingtang dingtang scheme aro kamrangko ia jolni manderangna nambate on·na man·gnok,” ine Sangma aganaha.
Ia Batabari C&RD Block-ko nokdonggae on·angani apsan salon a·dokni Chief Minister, gipin dilgiparang baksa Bhaitbari (Rajpur)-o veterinary dispensary-koba kulie on·angjolaha.
Ia veterinary dispensary-ko NABARD-ni ning·o gong lak 90.4 koros ong·e rikahachim.
Ia apsan salon a·dokni Chief Minister, FOCUS+ program-ni card-rangko suale on·angan baksana PROGRESS scheme-ni ning·o kuroiler do·orangkoba suale on·angaha.
FOCUS+ program-ni ning·o sak 23,491 manderangnaba ia salo gong kror 11.75 tangkarangko Chief Minister, Direct Benefit Transfer ka·e on·angjolaha.
