TURA: Assam aro Meghalaya a·dokni simarango aro Bangladesh a·songni samba jolrango mongmarang, cha·anirangko sandiroroe sokbarongengani a·sel, ia jolrango songdongenggipa manderang kenchipchipe janggi tangna nangtokenga aro tusigija walko re·atna nangtokenga ine kobor on·aha.
Bilsiantian mi minkarini somoirango mongmarang, cha·anirangko sandiroroe Meghalaya aro Assam a·dokni simarang gita aro Bangladesh a·songni sima gita re·pakrongengachim aro bang·a somoirangon a·sel ong·anirangko knana aro nikna man·rongengachim.
Koborko on·ani gitade, Assam a·dokni Goalpara a·ja jol baksana North aro West Garo Hills a·jani mitam bakrang gita da·ororo mang 8 ba mang 10-mangni gita mongmarang, biap damsaoni biap damsaona re·roroe dongenga aro iani a·selan songni nokni manderang, tuna cha·na man·gija dongtokna gita nangenga.
Batanggimin salgittamni gisepon Goalpara a·jao komibeoba sakbonga manderang so·otako man·aha aro ia manderangoni saksakode Mongolbar salo mongmarang doke donangaha ine kobor on·timgiparang u·iataha.
Iandake mongmarang, songni nokni manderangko aro manderangni gam-jinrangko kal·ake donangengani gimin Assam Goalpara a·jani Agia jolrango aro West Garo Hills a·jani Tikrikilla jolrango Forest department-ni manderang aro police-rangko nitimna gita donataha ineba kobor on·aha.
Indake ong·engon, Bangladesh a·songni simao donggipa Baghmara jolrangoba mang 40-na baten mongmarang re·roroe dongengani a·sel songni nokni manderang kenchipchipe dongna gita nangtokenga ine kobor on·aha.
Jolo songdongenggipa manderangni parakatani gitade, batanggimin antignimangonin ia mongmarang, ia jolrango donggipa songrangona re·bae manderangni mi misirangko aro nok-jamrangko nisie galrongenga.
Ia mongmarangko South Garo Hills a·jani Sibbari aro Baghmara-ni giseprango nikna man·rongenga aro ia mongmarangara Angratuli Reserve Forest samba jolrangoni re·baahakon ine forest official-rang chanchichipenga.