SHILLONG: National People’s Party (NPP)-o napchina gita People’s Democratic Front (PDF)-ni dilgipa aro Cabinet Minister Banteidor Lyngdoh-na gong kror 5 tangkarangko on·achim ine a·kanganiko NPP-ni national president aro a·dokni Chief Minister Conrad K Sangma jegalatskaaha.
“Iani bidingo anga an·tangde maming kobor dongja aro angni ma·siani gitade, ian kakket ong·ja,” ine Sangma parakataha.
National People’s Party (NPP)-o napchina gita una gong kror 5 tangkarangko on·achim ine re·anggipa Budbar salo, Mawkynrew-ni People’s Democratic Front (PDF) MLA aro a·dokni Cabinet Minister Banteidor Lyngdoh a·kangatahachim.
Lyngdoh-ni iandake a·kanganiko jegalatengon, “MDA-ko dilgipa ong·e batanggimin jabri atani gisepo NPP, namroro silroroani kamrangko bang·en ra·bana jotton ka·dilaha,” ine Sangma parakataha.
Batanggimin bilsi 20-ni gisepo, 2018 bilsioni rama jal·langrangko bang·bate tariaha, simarango ong·enggipa golmalrangko namatna kamko ka·aha, game ge·e cha·giparang, self help group-rang aro chadamberangba skangona bate bang·en dakchakanirangko man·aha aro Meghalaya a·doko ong·atanggipa Meghalaya Games baksana North East Olympic-rangchi chadamberang bang·en namgnirangko man·aha ineba Chief Minister parakataha.
“Iandakgipa kamrangni a·selsa bang·a dilgiparangan ching baksa bakrimna kusi ong·tokenga,” ine ua aganaha.
NPP-ni kamrango manderang kusi ong·aha ine janapatengon, “Ia chang election-o chinga bang·bata manderangni chingna pu·onaniko nikna ka·dongenga,” ine NPP-ni national president parakataha.
Indake ong·engon, NPP-o napna gita PDF-ni dilgipana gong kror 5 tangkarangko on·achim ine matnanggipani bidingo kakketko am·sandichina gita Mawlai-ni MLA PT Sawkmie, Meghalaya a·dokni Chief Electoral Officer FR Kharkongor-ko didiatskaaha.