SHILLONG: Meghalaya a·dokni manderangko BJP-NPP dolrang cha·boke kataha ine Trinamool Congress (TMC)-ni national spokesperson Saket Gokhale matnangatenba, ia changde BJP aro NPP dolrangko TMC, apsan dake cha·bokna cholko on·jawaha ine parakataha.
2017 bilsini December 16 tariko Prime Minister Narendra Modi-ni Polo Ground-o jinmana aganprakanggipa kattarangko gisik ra·atpilengon, “Ua somoio PM Modi, 2018 bilsini Meghalaya Assembly election-na campaign ka·engmitingo, gitcham sorkariko matnangenba, ‘Ma·mong sorkarioniko tangka paisarangko man·soengoba Meghalaya a·doko maming namroro silroroaniko nikna man·jaenga aro CAG Report-ni gitade, batanggimin bilsidokni gisepo Meghalaya a·doko gong kror 908 tangkarangko jakkalchipgija donaha’ ine aganahachim. Bilsi 5 salgnini ja·man PM Modi, re·anggipa antio Meghalaya a·dokona re·bapile ia apsan Polo Ground-on jinmana aganprakangtaiaha aro unbaksa ua somoio Meghalaya a·dokni CM aro BJP baksa bakrimenggipa NPP-ni dilgipa Conrad Sangma-ba dongpaachim,” ine Gokhale parakataha.
“Ia changoba PM Modi, Meghalaya a·dokni manderangna dal·a dal·a kattarangko ku·rachakangaha aro Conrad Sangma-ba bilsi 5-na kam choligijanina kratcha·gija uni agananiko nitime dongpaaha. Meghalaya a·dokni manderangna maiko PM Modi aganjahachim uara, ia 2022 bilsini September jao CAG-ni report-ko Meghalaya Assembly-o parakahachim aro CAG-ni report gitade, skanggipao komibeoba ming 62 project-rang matchotani tarik batpilahaoba Meghalaya a·doko matchotchipkuja aro ia project-rangoni mitamde bilsi 10-na skangan matchotna nangpilahachim. Gnigipao, 2018 bilsioni gong kror 1,638-na batgipa ming 32 project-rang matchotchipjaha indiba koros ong·anide gong kror 214.37 ong·aha. 2017 bilsio koros ka·gijagipa gong kror 908-ni gimin PM Modi inditan simsakbebegipa ong·genchimode maini gimin da·o changgni batgipa gong kror 1,638-ni project-rangna jrip dongskaenga?” ine TMC-ni national spokesperson sing·doataha.
Bilsi 5-na Meghalaya a·dokni manderangko cha·bokani ja·manba NPP aro BJP dolrangchi dilenggipa MDA sorkari, an·tangtangni kamko dongnuna jotton ka·kuenga ineba Gokhale matnangataha.
“Meghalaya a·dokko nisigalna gita BJP dol, Delhi aro Guwahati-oni Meghalaya-ko da·o bilsi 5-na chalaiangtaikuna ka·dongenga indiba iako TMC ong·na on·jawaha. BJP aro NPP dolrangni manderangko tol·gipa katta mingantikon chinga jinmana parakgen aro sing·dogen,” ine Gokhale parakataha.