SHILLONG: Meghalaya a·doko BJP dolko manderang ra·chaktokengaha ine ka·dongengani gimin re·baenggipa 2023 bilsini Assembly election-o BJP dol, a·dokni dam 20-25 seat-rango susae man·a dipet bang·bata seat-rangkon chena gita krengenga.
BJP dol ning·oni koborko on·ani gitade, ia chang Assembly election-o BJP, komibeoba damdok seat-rangkode chena ka·dongenga aro BJP-ni state president Ernest Mawrie-ni dilanichi uamang man·a dipet seat-rangko chena krengenga.
Batanggimin bilsirango Meghalaya a·dokni Bharatiya Janata Party (BJP)-ni ning·o bang·en meligrikgijanirangko nikna man·ahaoba da·o 2023 bilsini Assembly election-na skangde apsan meli-nangrime kamrangko ka·na a·bachengtokskaahachim.
Bilsi bongani gisepo a·dokni BJP dol ning·o bang·en meligrikgijanirangko aro saksa sakgipinni kosako matnanggrikanirangko nikna man·genchimoba da·o ia chang election-ode party-tangko cheatna gita pilak membor-rangan ku·cholsan ong·e kamrangko ka·skaengahachim.
Kobor on·timgiparangni u·iatani gitade, batanggimin bilsirango BJP-ni state president Ernest Mawrie-ni kamo kusi ong·tokjae bang·a membor-rangan meligriktokjahaoba da·o BJP-ni MLA-rangsan ong·aigija, party-na kamko ka·enggipa aro membor pilakan nangrime kamrangko ka·skaengaha.
A·bachengode Meghalaya a·doko BJP-ni bang·bata membor-rangan state president Ernest Mawrie-ko ra·galchina dabitokahachim indiba da·o BJP-ni membor-rang pilakan, an·tangtangni gisepo meligrikgijanirangko bon·ate, doltangko cheatna gita ku·cholsan nangrime kam ka·na a·bachengtokengaha ine kobor on·timgiparang parakataha.
Batanggimin somoirango, a·dokni sakbri MLA-rang, chong·motan Benedic Marak, Ferlin CA Sangma, HM Shangpliang aro Samuel Sangma, BJP-o napangahachim aro mikkang jao gipin MLA-rangba BJP-o napna sienggiparang dongkuenga ine BJP-oni kobor on·timgiparang parakataha.
Koborko on·ani gitade, BJP-ni state president Ernest Mawrie-ba West Shillong-oni susana siengani gimin West Shillong constituency-o BJP-ni state president baksana NPP-ni Mohendro Rapsang aro UDP-ni Paul Lyngdoh susagrikna sienga.