TURA: Sukrobar salo, Minority Affairs-ni Union Minister of State (MoS) John Barla, adita salrangna skang a·dok sorkarini nokdonggae on·anggipa PA Sangma Stadium-ko niangaha aro ia stadium-ko matchotsrapgijan nokdonggae on·aha ine National People’s Party (NPP)-chi dilenggipa MDA sorkariko matnangataha.
Ia stadium-ko niangani somoio Barla baksa Meghalaya BJP-ni state president Ernest Mawrie, Tura-ni MDC Bernard Marak aro gipin dilgiparangba dongpaahachim.
Ia PA Sangma Stadium-ko Minority Affairs Ministry-ni ning·o rikna gita 90 percent-kode ma·mong sorkari chame on·ahachim aro bangki tangka paisarangko a·dok sorkari chamskaahachim.
Indake ong·engon, Sukrobar saloni a·bachenge Minority Affairs-ni Minister of State John Barla, Garo Hills-ona re·baaha aro ua PA Sangma Stadium-ko nianichi uni Garo Hills-o wenaniko a·bachengataha.
“Ia project-na tangka paisarangko ma·mong sorkarisa chame on·ahachim indiba ma·mong sorkarini chame on·ani giminde mamingkoba janapgija a·dokni Chief Minister an·tangsa ia stadium-ko nokdonggae on·aha. Ia stadium-ko da·o chu·gimik matchotsrangkujachim indiba uamang da·on iako nokdonggae on·aha. Ia pilakan politics-ni gita dake mesokanisan ong·aia. Ia stadium-ko rikanio ma·mong sorkarini bang·bea tangka paisarangko jakkalahani gimin ia stadium-o janapanide dongna nangachim,” ine Barla, kobor ra·timgiparangna parakataha.
Ia stadium-ko nokdonggae on·aniara a·dok sorkarini manderangko cha·bokanisa ong·enga ineba matnangataha.
A·dokni namroro silroroaninade bakrimesa kamko ka·na nanggen ine janapatengon, ma·mong sorkarini on·gilanikon a·dok sorkari nichanggalenga ong·ode manderangni gisepo ka·a ding·chaoani ong·katgen ine Barla parakataha.
PA Sangma Stadium-ko rikanirang namsrangjaha ineba Barla suk ong·gijaniko parakataha.
PA Sangma Stadium Sports Complex-ni Football Stadium-ko adita salrangna skangsan, a·dokni Chief Minister Conrad K Sangma nokdonggae on·angahachim indiba ia sports complex-ni gipin bakrangkode ia 2023 bilsini bon·angachibarasa nokdonggagen ine parakatahachim.