SHILLONG: Meghalaya a·dokni nokdang ge·antio donggipa me·chik sakpraknan gong 1000/- tangkako on·na ku·rachake Trinamool Congress (TMC)-ni ra·gatgipa Meghalaya Financial Inclusion for Women Empowerment Scheme (MFI WE) ba ‘WE Card’ scheme-ni bidingo Meghalaya a·dokni BJP dol, Election Commission-na badi ka·dona tik ka·engani gimin je kacharioba badi ka·echina Meghalaya TMC ra·biataha.
“Me·chikrangko mangrakbatatna gita kamko ka·na chingo chu·gimik bilrang donga aro iako chinga chu·sokatna ku·rachakaha. Iano chinga maiba niamko ba election-ni niamrangko pe·enga ine BJP chanchienga ong·ode uamang je kacharionaba re·ange badi ka·ena man·aigen. Iako dake uamang maming namgniko man·jawa,” ine Meghalaya TMC-ni president Charles Pyngrope parakataha.
2012 bilsini Lok Sabha election-na skang, manderangni account-o gong lak 15 tangkarangko chipatgen ine ku·rachakeba chu·sokatna man·jahani gimin BJP-ko jegalatengon, BJP gita ong·gija TMC dolde, sorkariko rikna man·ahaon, ia ku·rachakanirangko chu·sokate on·gen ine Pyngrope parakataha.
Meghalaya a·dokni election-rango pangnan vote-rang priprae bon·rongaia ine janapatengon, gipin political dolrang baksa bakrime sorkariko rikna man·genchimoba TMC, ia ku·rachakaniko chu·sokataigen ine Meghalaya TMC-ni president parakataha.
“Iako chinga manderangna ku·rachakaha aro iako chinga chu·sokatesa dongen. Sawa badia political dol, manderangna iandakgipa namgnirangko on·na sikjawa?” ine Pyngrope sing·doataha.
Ia ‘WE Card’ scheme-ara election-ni somoio manderangko salna miksonge ra·gatgipa scheme-sa ong·enga ine adita salrangna skangsan, BJP-ni state president Ernest Mawrie matnangatenba, ia scheme-ni bidingo Election Commission-na badi ka·dona gita manchiangahachim.
‘WE Card’-ko re·anggipa December-ni 13 tariko, TMC-ni dilgipa aro West Bengal a·dokni Chief Minister Mamata Banerjee-ni Shillong-ona re·baanio a·bachengate on·angahachim.
Ia ‘WE Card’ scheme-ara a·dokni nokdang ge·antion me·chik sakprakna japrako gong 1000/- tangkako dakchake on·na TMC-ni ra·gatenggipa scheme ong·achim aro ia scheme-ni namgniko TMC, Meghalaya a·doko sorkariko rikna man·ahaon on·na ku·rachakengachim.