TURA: Jolo songdongenggipa manderangni namgnina North Garo Hills a·jao Adokgre C&RD Block-ko sorkari songe on·ahaoba ia block-o chu·gimik kamrangko ka·kujaenga ine A·chik Holistic Awakening Movement (AHAM) Adokgre regional unit parakatenba, ia gital block-ko ta·raken chu·gimik chalaichina a·dokni Chief Minister Conrad K Sangma-ko didiataha.
Adokgre C&RD Block-ko re·anggipa November jani 15 tariko a·dokni Chief Minister kulie on·angahachim ine nikna man·a.
Ia gital block-ni bidingo janapatengon, ia block-ni ning·o dam 43-na baten songrang donga aro ia songrangoni 99 percent-an BPL gadangni nokdangrangsa ong·e, ia gital block-o pangchakpaenggiparang ong·a ine AHAM Adokgre unit-ni dilgiparang parakataha.
“Adokgre block-ko kuliahaoba ia block-o chu·gimik kamrangko ka·kujaengani a·selan songni manderang da·oba kilometre 25-mang chel·ao donggipa Kharkutta C&RD Block-onasa re·ange an·tangtangni nanga kamrangko ka·tokna nangenga,” ine AHAM Adokgre regional unit-ni dilgiparang talataniko on·angenba, ia Adokgre block-ko chu·gimik chalaiahaode songni manderang bang·en namgnirangko man·gnok aro manderangni neng·nikanirangko namatna man·gnok ine parakataha.