TURA: South Garo Hills a·jani Chokpot C&RD Block-na gital office-ko aro Chokpot-o Degree College-ko rikna gita Mongolbar salo, a·dokni Chief Minister Conrad K Sangma, pangchakanirangko songe on·angaha.
Chokpot C&RD Block-ni gital office-ko gong kror 2 aro NEC-ni dakchake on·enggipa Chokpot Degree College building-ko gong kror 2.81 koros ong·e rikgen.
Pangchakanirangko songe on·angani somoio a·dokni Chief Minister, jinmana aganprakangengon, Chokpot block office-ko aro Degree college-ko rikanichi ia jolrango songdongenggipa manderangni janggi tanganio dingtanganiko ra·bana man·gnok ine parakataha.
“Chokpot-ni manderangna chingni ku·rachakaniko chinga chu·sokate on·na kusi ong·a. Ia gital office nokko rikanichi sorkarini kamrangko nambate aro somoi gita ka·na man·gnok,” ine ua aganaha.
A·dokni gipin C&RD block-rangnaba gital office nokrangko rikna gita tangka paisarangko chamataha ineba Chief Minister parakataha.
Chokpot jolrango lekka porani gita ong·enggipa obostani gimin janapatskaengon, ia gital college building-ko rikanian ia jolrango lekka porani gadangko tang·doatna dakchakani ong·gen ine Sangma aganaha.
“Chokpot jolrango namnamgipa skul aro college-rang dongjani a·sel chatro chatrirangni man·enggipa neng·nikanirangko chinga ma·sienga. Uni gimin chinga chatro chatrirangna lekka poraniko ra·anio dakchakanirangko on·na jotton ka·enga,” ine Chief Minister parakataha.
Ia tom·anio a·dokni Chief Minister, FOCUS aro FOCUS+ program-rang baksana YESS aro PROGRESS program-rangni giminba agan-talate on·angaha.
Ia salo ua FOCUS+ program-ni ning·o a·dok gimikni sak 53,832 manderangna gimik gong kror 26.91 tangkarangko bank account gita chipe on·angjolaha.
Chokpot Block office aro Degree college-na CM-ni jakchi pangchakaniko songa
Date:
Share post: