SHILLONG: South West Khasi Hills a·jani Ranikor community health centre (CHC)-o kam ka·gipa manderang chu·ongjaengani a·sel songni nokni manderang neng·nikanirangko chagrongna nangtokenga ine All Khasi Hills A·chik Federation (AKHAF) suk ong·gijaniko parakataha.
AKHAF-ni president Cleafstar Ch Marak-ni parakatani gitade, Ranikor CHC-o doctor-rang aro dingtang dingtang kamrangko ka·gipa manderang dongjani a·selan saenggipa ding·enggipa manderang maming sanna bananirangko man·jae obosta namjabatroroangengahachim.
“Ranikor CHC-o doctor-rang aro dingtang dingtang kam ka·gipa manderang dongjani a·sel manderang sanna bananirangko ra·na man·jae neng·nikanirangko chagrongna nangtokenga ine chinga bang·en badi ka·anirangko man·soaha. Uni gimin ia CHC-na chu·onga gita kam ka·giparangko on·china chinga sorkario mol·molenga,” ine Marak parakataha.
Marak-ni parakatani gitade, Ranikor CHC-ona South West Khasi Hills a·jani bang·a songni manderangan sanna bananirangko ra·na gita re·barongengachim indiba ia health centre-o kam ka·giparang dongjae songni manderang, sanna bananirangko ra·na man·tokjaenga.