EGH-o TB sagiparangna cha·ani suale on·ani program-ko ong·ata

WILLIAMNAGAR: 2025 bilsini gisepon Tuberculosis (TB) sabisiko bon·atsrangna miksonganirang dongengani gimin East Garo Hills a·jao TB sagipa manderangna an·seng baljokaniko on·na gita re·anggipa Mongolbar salo East Garo Hills a·jani District TB office-ni gita TB sagiparangna cha·ani suale on·ani program-ko ong·atangaha.
TB sagiparangna cha·anirangko suale on·na gita program-ko ong·atanio Williamnagar-ni MLA Marcuise N Marak, mongsonggipa sokgipa ong·e jinmana aganprakangengon, TB saenggipa manderangni namgnina ia program-ko ong·atahani gimin District TB office-ko mittelpilangenba, TB sagiparangko sannanio ua an·tangba pilak nanga dakchakanirangko ia office-na on·anggen ine ku·rachakaniko on·angaha.
Ia program-ko ong·atanio, East Garo Hills a·jani Senior Medical & Health Officer Dr SR Marak, jinmana aganprakangskaengon, TB sabisiara batninggipa sabisi ong·a aro je manderangan an·chi gri ba an·chi gnang gusuenga, be·enni gita jreani komienga, be·en an·jrime saenga ba walni somoio ding·ol ong·kate saenga, uandakgipa manderangde sepangbatgipa sorkari hospital-rangona re·bae indin sanna bananiko ra·na man·gen ine parakataha.
Ia program-ko ong·atanio, Williamnagar Civil Hospital-ni Medical Superintendent Dr CEN Sangma-ba jinmana aganprakengon, TB sabisiko sannani bidingo talate on·angenba, ia sabisiko jadokni gisepon sanna man·a ine parakangaha. Doctor-rangni ku·pattiani gita samrangko somoi gita aro matchote ringchinaba ua TB sagipa manderangko didiangaha.