SHILLONG: India a·songo Bharatiya Janata Party (BJP) sorkariko rika intalan maharini gita a·songko sason ka·ani bon·angaha aro ia sal somoirango man·e cha·giparang, politics kal·e rona biap dongjaha ine adita salrangna skang, BJP-ni tom·bimonganiko Shillong songjinmani Upper Mawprem-o ong·atanio Electronics, IT, Skill Development & Entrepreneurship-ni Union Minister of State Rajeev Chandrashekhar parakataha.
Sukrobar salo, West Shillong constituency-ni sak 1000-mangni gita me·chikrang, BJP-o napangtokahachim aro uamangko rimchaksona gita dingtangmancha program-ko Upper Mawprem-o ong·atangahachim.
Ia tom·anio Union Minister of State baksana BJP-ni state president Ernest Mawrie, BJP Minister Sanbor Shullai aro BJP-ni gipin dilgiparangba bakko ra·e, BJP-o napanggipa me·chikrangko rimchaksoaha.
Ia me·chikrangna rimchaksoani kattarangko aganangengon, BJP baksa bakrimna re·bae ia gital membor-rangba da·o Prime Minister Narendra Modi-ni gital India-na jumang nikanio bak ong·pagnok ine Chandrashekhar parakataha.
Namroro silroroaniko ra·bana kam ka·anio bak ong·pachina aro a·songni manderangko tang·doatna gita rakbee kam ka·enggipa PM Modi-ni kamko mangrakbatatchina gitaba ua BJP-ni gital membor-rangko didiangaha.
“Da·alo India a·song, maharini gita sason ka·aoni jakgitel ong·aha aro politics-ba da·o man·e cha·giparangni jako ong·jaha. An·chingo Tribal jatonin skanggipa me·chik president dongaha aro Prime Minister an·tangba onbegipa nokdangonin ong·a. Ramram manderangni neng·nikanirangko an·chingni Prime Minister namen ma·sia aro iani giminsa ua a·songna an·tangko onatbee dangdike on·enga aro iako uni BJP dolba ja·rikenga,” ine Chandrashekhar aganaha.