Tol·gipa cheque-rangko suala ine Saleng, NPP membor-ko matnanga

SHILLONG: National People’s Party (NPP)-na kamko ka·enggipa Besterfield N Sangma, Gambegre block-ni ning·o donggipa dingtang dingtang dolrangna tol·gipa cheque-rangko sualaha ine Nationalist Congress Party (NCP)-ni state president aro Gambegre MLA Saleng A Sangma matnangatenba, ia NPP membor-ni kosako ja·kuko de·china police-rangko didiataha.

Saleng-ni parakatani gitade, Besterfield-ni tol·gipa cheque-rangko manderangna suale on·aniko noksarangonikoba nikna man·ahachim.

Ia cheque-rango ‘MegLIFE Village Project Implementation Committee’ ine seanirang donga indiba ia cheque-rango maming mohor su·a aro soirangba dongjachim ineba Gambegre MLA parakataha.

Iandake songni manderangko cha·bokna jotton ka·ahani gimin an·tangni suk ong·gijaniko parakatengon, darang official gri sawa, Besterfield-ko iandake songni manderangna tol·gipa cheque-rangko sualna bilko on·aha ine Saleng sing·doataha.

“Election-na skang uamang manderangko cha·bokengani gimin district administration aro police-rang, uamangni kosako ja·kurangko de·na nanga aro mokordomako ka·na nanga,” ine NCP-ni state president parakataha.