SHILLONG: Mongolbar salo, 193 Battalion BSF-ni sipairang, Bangladesh a·songona palsrukatna miksonge ra·angenggipa gong lak 47-ni cosmetics ba nonga-sitani bosturangko East Khasi Hills a·jani simaoniko rim·na man·aha.
BSF doloni koborko on·atani gitade, Mongolbar salo niam gri bading chiwalenggipa manderang, ia nonga-sitani bosturangko East Khasi Hills a·jani Barmanbari jolni chiring gita Bangladesh a·songona palsrukatna ra·angengmiting somoio BSF-ni sipairang rim·rikna man·aha.
Ia bosturangko ra·angenggipa manderangko niksoon, BSF-ni sipairang uamangko rim·sona jotton ka·ahachim indiba ia manderang, an·tangtangni bosturangko ua biapon gale kataha ine BSF official-rang u·iataha.
Ia nonga-sitani bosturangko ja·mano BSF official-rang, nanga gita ja·kurangko de·china Customs official-rangni jako pakwate on·ataha.
Kobor on·timgiparangni u·iatani gitade, India a·songo tarigipa nonga-sitani bosturangko Bangladesh a·songo dam rakbate manderang bretokengani gimin, India a·songni bosturangko niam gri Bangladesh a·songona badingsrukatskaengachim.