SHILLONG: 2018 bilsio State Assembly Election ong•na skang, unomiting a•dokni skotong minister ong•enggipa Dr Mukul Sangma aro uni sorkarini kosako bang•a tangka-paisani bidingo matnanganirang nakataha. Haida iani a•selan, manderang Congress-ni bilsi 8-na sason ka•aniko gale, NPP-ni dilenggipa MDA sorkariko seokahakon ine chanchichipna gita man•a. 2018 bilsio, skia-porani bidingo Meghalaya namen ja•manchakbeengachim. Bang•a skul-nokrangkon taridapani dongjachim, M-TAB-ko sualani bidingrangoba ong•gija dakanirangko knaachim. A•dokni BJP-ni aganani gitade, RTI ka•e am•sandianio a•dok sorkari ge 25,000 M-Tab-rangko gong 8,990-prakna breaha ine mesokahachim indiba tablet ge•prako gong 6,850 ine dam manchako nikna man•aha. BJP iani bidingo CBI-ni gita sandirikkitaniko dakna dabiaha. Bilsi bonga batangaha, da•o Dr Mukul aro una kam ka•e on•enggipa I-PAC iandakgipa cholrangko manderangko togina gita sanditaienga. Iarangko dakengon, agantimgiparang, social media-o ingrikgiparang aro sorkariko chalaigiparangni gimin am•sandie nigiparangko iandakgipa togianirangko sandina rakkiaha. Indiba, uamangni sandie nianirango jegrik-ingrikgiparang, mandeko bimang sale social mediao gatatanirang aro da•o dilenggipa minister-rang aro bobilrangni kosako namgija agananirangkosan nikaha.
Indake ong•engon, Conrad Sangma-ni sorkari Meghalayani dingtang dingtang bakrango dam 2000 skulrangko taridapengaha, aro adita skul-nokrangko taridapman•aha. Dam 21 People’s Collegerangko a•bachengatengaha, chubata gadango poraichakramrangko a•ja ge•prakon dakna am•engaha, Capt. Williamson State University-ko Ampati-o rikaha, Shillong Government College of Engineering, College of Architecture and Urban Planning-ko Turao, Model Degree College-ko Patharkhmah aro Rongjeng-o rikengaha. Da•o dongenggipa college-rangko Model degree college dake Nongtalang, Mendipathar aro Mawkyrwat-o tariengaha. Polytechnic institute-rangko Ri Bhoi, West Khasi Hills, aro South Garo Hills a•jarango rikenga, aro Williamnagar polytechnic-koba rikna a•bachengaha.
Congressni sason ka•ani somoio chadamberangko nirokgija galchipahachim, indiba da•o uamangni nangnika gita nirokanirangko dakengaha. A•dokoni party ong•jani gimin AITC a•dokni nangnikaniko u•ina gita man•jaengnaba donga aro batanggimin sorkarirangni galchipanikoba man•aha ong•jaode uamang ia chadambe dolrangna kam ka•janaba dongachim. Da•o Meghalaya-ni manderang uamangni kattarangko bebera•genma ma an•tangtangni gisik seng•aniko jakkalgenma, uko nina nangkuenga.
AITC iani bidingo an•tangtangni a•dok West Bengal-onin jegalako man•enga. Uamangni Higher Educational gitcham minister tangkarangko ong•gija dakbewalo ra•chakani bidingo sastiko man•enga aro da•o pattoko dongenga. Iako uni aro unbaksa kam ka•gipa Arpita Mukherjee-ni nokrango bang•a tangkarangko nikani ja•mano rim•a man•aha. Krorni kror tangkarangko man•ani ja•mano, skigiparangko rakkiani bidingo ong•gija kam ka•anirangko rim•a man•ani ja•mano aro Arpita Mukherjee baksa uni melianiko u•iani ja•mano, uamangni party bimung namgijako man•aha. Skigiparangko rakkianio ong•gija bewalo kamrangko ka•aha ine kobor man•ani ja•mano Kolkata High Courtni gita sak 142 skigiparangko ra•galaha. Indake ong•engon, Meghalaya-o dongsoenggipa ministerrangba tangka jakkalsretanio bimung donggiparang ong•e, aro je political partyan an•tangni a•doko krorni kror tangkarangko jakkalsretanio bimung dongode, iandakgipa sorkariko baseanio Meghalaya-na maidakgipa mikkangchi dongsoa ine sing•ani gnang. Je sorkarian kam ka•anirango da•ororo chu•sokaniko ra•baenga, ua sorkarisa mikkangchi namroro-silroroaniko ra•bana man•gen. Manderangna ian basena rakbea ong•ja.