SHILLONG: Assam gita dakgipa gipin a·dokrango gitan Meghalaya a·dokoba National People’s Party (NPP)-ko bakan Bharatiya Janata Party (BJP) cha·minokna sienga ine Bristibar salo All India Congress Committee (AICC) parakatenba, MDA sorkarini tangka paisa jakkalsretanirangna ku·rangko on·jaha aro chonchongipa jatrangni kosako kamrangko ka·enga ine BJP-ko matnangataha.
Iani bidingo kobor ra·timgipa manderang baksa agangrikengon, Assam a·dokoba BJP, Asom Gana Parishad (AGP) dolni janggilo re·chengenba ja·manode AGP-kon cha·mikonaha aro Meghalaya a·dokoba apsan daken NPP-ko dakna sienga ine AICC-ni media coordinator-rang, chong·motan Bobeeta Sharma aro Matthew Anthony parakataha.
BJP dolde salgro salaram jolko ma·sichakgipa dol ong·ja ine matnangatengon, MDA-o bakrimenggipa gipin dolrang ka·saani gimin ong·ja indiba kenesa BJP-na bame on·aha ine Matthew Anthony parakataha.
“BJP-na bame on·jagenchimode salgipinon CBI, ED na·simangni do·gako doktikegnok aro iani gimin jolni political dolrang kenenba bame on·aha,” ine Anthony aganaha.
Iana skang, AICC-ni sakgipin media coordinator Bobeeta Sharma-ba BJP-ko matnangatengon, BJP-ni state president Ernest Mawrie an·tangan MDA sorkariko tangka paisa jakkalsretgipa ine matnangeba MDA sorkarini tangka paisa jakkalsretaniko sandirokatna gisik nangjaha ine parakataha.
NPP-chi dilenggipa MDA sorkariko tangka paisa jakkalsreta ine matnangeba maming ja·kurangko de·jaha ineba ua NPP-ni state president-ko matnangataha.
Meghalaya a·doko chadambe dilgiparangkosa nangbatenga ine janapatengon, ia chang Assembly election-o Congress dol, gital aro chadambe candidate-rangkosa susaatenga ine AICC-ni media coordinator-rang parakataha.