SHILLONG: Re·baenggipa February jani 27 tariko ong·atna sienggipa Meghalaya Assembly election-na cabdidate-rangko seokani bidingo chanchirimna gita Budbar salo, Bharatiya Janata Party (BJP)-ni state election committee, Tura-o tom·aniko ong·atanggen.
Iani bidingo kobor ra·timgiparangna u·iatengon, BJP-ni state election committee, Tura-o tom·e chanchirimangenba, Assembly election-na candidate-rangko seokanggen ine Robibar salo, BJP Meghalaya-ni state president Ernest Mawrie parakataha.
Mawrie-ni parakatani gitade, a·dokni pilak dam 60 Assembly constituency-rangon BJP susana gita miksongengachim.
“Da·o dipet chinga dam 55 constituency-rangona baten candidate-rangko man·ahani gimin bangki dongkuenggipa constituency-rangnaba chinga candidate-rangko man·kuna ka·dongenga,” ine Mawrie aganaha.
Indake ong·engon, North Shillong constituency-na BJP-ni state spokesperson Mariahom Kharkrang aro party-ni membor Michael Kharsyntiew-ni gisepo adita jegrikanirangkoba nikskana man·engachim.
Michael Kharsyntiew-na gitcham MDC Martamlin Pyrbot chakpaaniko on·engani gimin North Shillong constituency-oni susana gita BJP-ni tikitko man·gen ine ka·dongengon, Kharkrang-ba ia chang election-o North Shillong constituency-oni BJP-ni tikitchin susana ka·dongsoskaengachim.
“Bilsichetna anga BJP-ni membor ong·ahani gimin tikitko anga man·telgen ine ka·dongenga. Tikitko man·jagenchimode anga angni manderang baksa agangriktaina nanggen,” ine Kharshyntiew parakataha.
Tikitko on·ani giminde Delhi-o BJP-ni dilgiparangsa chanchianggen ineba ua agantaiaha.