TMC-ni ku·rachakenggipa scheme-rangni bidingo NPP sing·doa

SHILLONG: TMC-ni ‘WE Card’ nokdangprakni me·chik sakprakna tangka gong 1000-ko japrako, bilsi gimiko chu·gimik gong 12,000-ko on·na ku·chakaha. A·doko lak 7-na baten nokdangrang donga aro ian state fund-na kror 840-na baten tangkarangko koros ong·atgen. Iana agreba, Meghalaya Youth Empowerment (MYE Card) Scheme-ni gita bilsi 21-40-ona ong·gipa kam grigipa chadamberangna japrako gong 1000-ko on·na ku·chaka. Indita bilsi ong·gipa manderang lak 11 donga, uamangoni 50% kam grigipa ong·genchimoba, kror 700 tangkarang koros ong·gen. Ia 1500 krorni korosrang a·dok sorkarini korosrangni 50%-ni gita ong·a (chu·gimik koros 15,500 krormang ong·a). Niate nigenchimode, ia ku·chakanirang mamung pangchakani gri aro ong·na amgijagipa ong·a. Indimangba, TMC ia ku·chakanirangko dakna gita sandirikkitanirangko dakmanaha, uamang ia scheme-ko Bengalo chu·sokataha ine aganani gnang. Bengal-ni women’s empowerment schemeni koros kror 13,000-mang ong·aha aro kror 1.6 manderangni gita namgnirangko man·aha. Indiba oppositionni dilgipani aganani gitade, kror 5 me·chikrangna ku·chakaoni kror 1.6 me·chikrangnasan man·gnirangko on·ne uni election skang ku·chakgimin kattako pe·aha. Lakshmi Bhandar schemeni gita bimung segatanirangko songrango camprangko ong·atanichisa dakna man·a. Ia camprangko a·dokko ba a·jako chalaigiparang ong·atgija partyni manderangsa ong·ata ine aganani gnang, aro ia scheme-ni gita online registration ba BDO-rangna dorgasto galatanikoba dakna on·ja. Iako dakani miksonganiara partyna chakgipa manderangnasan namgniko on·e uamangna vote-ko man·skana dakani ong·a.
West Bengal-ni bang·a TMC MLArangko skotong minister Mamata Banerjeeni jako an·tangtangni constituencyo kam ka·arangni bidingo nipilna tom·anirangko dakanio manengako man·aha, aro uamangna pu·ongiparang kusi ong·jaenga maina MLA-rang uamangni nangnikanirangko on·na jekai sorokrangko tarianiko ba chibimao guarerangko kae on·na  man·jaenga ine uamang an·tangtangan aganaha.
West Bengal sorkarini 2022-23-ni budget statement-ni gitade, 2010-11 bilsirango kror 19,500 fiscal deficit (man·ana bate koros ong·ani) ong·aoni, 2021-22 bilsio TMC-ni sasonni ning·o, kror 53,431-ona tang·doaha jean 300% ong·nasiple bariaha. Ia deficit-rang loanrangko ra·ani gimin ong·aha.
Meghalaya-na, a·paloniko loan ra·anirang mongsongbate (90%) ma·mong sorkarini ong·a aro uko Ia agency bank-rangan name dake nirokata. Uni gimin, loan-ko ra·na gita, ma·mong aro a·dokni meli-nangrimani aro project-ko matchotaniko dakna nangchongmota.
NPP-ni MLA aro agantimgipa Marcuise N Marak indine aganaha, “Dr Mukul sorkarini 2010-18-ona chalaianian M-LAMP project-o sakkiko mesokaha. Tangkako on·timgipa IFAD ia project-ko 2018 bilsio kam ka·gijani aro tangkarangko jakkalgijani a·selo chipna am·ahachim, da·o nibo, ia project namen kam ka·enga. NPP-ni dilenggipa MDA sorkari kror 10,000-na baten a·palchiniko tangkarangko man·aha, jean 2018 bilsio Kror 2,300-san ong·aiachim.
Beben, ia scheme-rang je sorkarinaba neng·nikaniko on·a, indiba political analyst-rangni dakchakanichi schemeko bikotani ia neng·nikanirangko namatja. Iarang mongsongabate an·tangtangko niksengatani, social mediao chonnike roani aro partyni agananirangko tarianirangkosan dakbata. Da·o Dr Mukul ia bakki cardni bidingo sing·anirangko maikai aganchaka aro manderangni dakchakaniko man·anina krenganiko nina nangengpiti.

Get real time updates directly on your device, subscribe now.

Comments are closed.