AITC-ni election manifesto aro ming 10 ku·mikchetaniko opraka

SHILLONG: Re·baenggipa February jani 27 tariko ong·atna sienggipa Meghalaya Legislative Assembly election-na All India Trinamool Congress (AITC)-ni election manifesto ba chu·sokate on·na miksonganirangko chapa ka·gimin lekka baksana ming 10 ku·mikchetanirangko Mongolbar salo oprake on·angaha.
Ia election manifesto aro ming 10 ku·mikchetanirangko AITC-ni national general secretary Abhishek Banerjee, oprake on·angaha aro ia tom·anio AITC Parliamentary Party-ni dilgipa Derek O’Brien, TMC-ni Meghalaya I/c Manas Bhunia, TMC legislature party-ni dilgipa Mukul Sangma, AITC-ni state president Charles Pyngrope aro AITC Meghalaya-ni vice president George Lyngdoh-ba dongpae bak ra·angaha.
Meghalaya Assembly election-na TMC-ni sak 52 candidate-rangko parakatmanahachim ine nikna man·a.
TMC-ni Meghalaya a·dokna ming 10 ku·mikchetgiparangoni mitamrangara, bang·bata cholrangko on·e economy-ko tang·doatna, nambata sal somoirangko ra·bana, Meghalaya a·doko me·chikrangko bil gnangatna, be·enni gita cholgri ong·giparangna, randi me·chikrangna aro butchuma budeparangna chu·onga gita dakchakanirangko on·na, game ge·e cha·giparangna nambate dakcgake on·na, nambata an·seng baljokaniko on·na, bi·sarangna nambata lekka porako on·na, a·doko songdongenggipa manderangna ringani chi aro pilak nanganirangko chu·onga gita on·na, doka dam·ani, kal·susaani, jatni daka rikani aro tourism-ko tang·doatna, a·doko donggipa jatni institute-rangko bilakatna aro uandakgiparangan ong·achim.