TURA: Re·baenggipa February-ni 27 tariko ong·atna sienggipa Meghalaya Legislative Assembly election-na Bharatiya Janata Party (BJP)-ni chu·gimik candidate-rangko February 2 tariko parakatna sienga.
Candidate-rangko seokani bidingo chanchirimna gita Budbar salo BJP-ni dal·dalgipa dilgiparang, Tura-ona re·baaha aro ia tom·aniona re·bae bakko ra·anggipa mongsonggipa manderangara, BJP (Organisation)-ni general secretary BL Santosh, BJP North East-ni co-incharge Rituraj Sinha, Assam Assembly-ni Deputy Speaker Dr Numal Momin, BJP Meghalaya-ni state president Ernest Mawrie aro gipinrang ong·achim.
Meghalaya Assembly election-na candidate-rangko seokani bidingo tom·e chanchirimangani ja·man kobor ra·timgipa manderang baksa agangrikengon, BJP-ni chu·gimik candidate-rangko February 2 tarikni gisepo parakatgen ine BJP-ni dilgipa BL Santosh parakataha.
BJP-ni state vice president aro Tura-ni MDC Bernard N Marak-ko politics-ni gita bon·atna jotton ka·gipa manderangni kosako BJP, a·songni dongiminrangko ja·rike a·jak sokskagen ineba Santosh parakataha.
“2010-11 bilsirango Congress dol, Amit Shah-ni kosako apsan dakgipa ja·kurangkon de·ahachim aro uamang ua somoio uko pattokoba chipatahachim. Da·alo Amit Shah bano ong·enga aro uko bon·atna jotton ka·giparang bano ong·enga an·ching pilakan nikna man·enga. Apsan daken, je manderangan Bernard Marak-ko bon·atna jotton ka·ahachim, uamangnaba apsan dakgipa kamkon mesokna nanggen, uamang jeba ong·china,” ine Santosh aganaha.
Politics-ni gita dakgrikanikode politics-ni gitasa dakgrikna nanga ineba ua aganaha.
“Saniba janggiko bon·atna dakpilede uamang jak sokna nangjachim indiba uamang Marak aro uni nokdangni janggikon bon·atna jotton ka·ahachim. Uni gimin uamangni kosako an·ching a·jak sokskana nangjawama?” ine Santosh, jinmao sing·doataha.