TURA: Dadenggre constituency-ni ning·o donggipa dingtang dingtang songrangko nirokna gisiko nangjahani a·sel songni nokni manderang neng·nikanirangko chagrongna nangtokenga ine Budbar salo, Dadenggre constituency-o Trinamool Congress (TMC)-ni candidate ong·e susaenggipa Rupa M Marak, Dadenggre-ni NPP MLA James K Sangma-ko matnangataha.
Dadenggre constituency-ni ning·o donggipa Kantananggre songo bilsi 10 ong·na sipile bijoli dongjae songni nokni manderang andalao dongtokna nangenga ine koborko man·soahani gimin Budbar salo, TMC-ni candidate Rupa Marak, ia songona re·ange songni manderang baksa agangrikeahachim.
Marak-ni parakatani gitade, Kantananggre songona re·ange songni manderang baksa agangrikon, changgittamna kingking Dadenggre-ni MLA ong·ahaoba, ua changsaba ia songrangona re·ange manderangni neng·nikanirangko nirokna gisik nangjaha aro songni manderang changni chang an·tangtangni neng·nikanirangko u·iatahaoba ua maming dakchakanirangko on·na gisik nangjaha ine songni manderang una parakataha.
“Ia songo indita bilsirangna duko chakenganiko kobor man·soenba anga an·tangan uamangni neng·nikanirangko ma·sie ra·na re·baaha aro uamangni angna parakatani gitade, 2018 bilsio James Sangma-ni power minister ong·engmiting somoion uamangni neng·nikanirangko namatchina uamang mol·moleahachim. Uamangni mol·moleon, ua uamangni transformer-ko taripilna gita gong 50,000-ko on·na ku·rachakatahachim indiba uni ja·man changni chang songni manderang uni nokona re·baon uko changsaba man·ejaha. Ian namen dukni katta ong·a,” ine Marak parakataha.
Dadenggre MLA-ko matnangatkuengon, ia songo dingtang dingtang skul aro college-rango poraienggipa chatro chatrirangba donga aro uamang pilakan andalaosa poraina gita nangtokenga ine TMC-ni candidate suk ong·gijaniko parakataha.
Iani bidingo ua bakan Power department-ni official-rangko gronge agangrikgen ineba Marak ku·rachakaniko on·ataha.
Constituency-ni manderangko nirokja ine TMC candidate, Dadenggre MLA-ko matnanga
Date:
Share post: