WGH-o gong lak 8 tangkarang baksana churangko rim·a

SHILLONG: West Garo Hills a·jao gong lak 8 tangkarang baksana churangko Election official-rang rim·aha ine Sukrobar salo, a·dokni Chief Electoral Officer (CEO) FR Kharkongor parakataha.
Meghalaya a·doko Assembly election-ko re·baenggipa February-ni 27 tariko ong·atengani gimin model code of conduct (MCC)-ko ra·gatahachim ine nikna man·a.
“Niam gri ra·bitgipa gong lak 8.96 tangkarang baksana gong 8000-na batgipa churangko Bristibar salo, West Garo Hills a·jaoniko rim·na man·aha,” ine Kharkongor, kobor ra·timgiparangna parakataha.
Meghalaya a·doko MCC-ko ra·gatchenga intal da·o dipet gong lak 29-na baten tangkarangko a·dokni dingtang dingtang biaprangoniko rim·na man·aha ineba a·dokni CEO parakataha.
Koborko on·ani gitade, Bristibar salo ia tangkarangko police-rang, Assam a·dokoni re·baenggipa mande saksaoniko rim·na man·aha.
Ia mandeo, ia tangkarangko ra·bitani maming lekka aro sakkirang dongjani gimin tangkarangko election official-rang rim·aha ineba kobor on·aha.
CEO-ni parakatani gitade, a·doko MCC-ko ra·gatahani gimin maming sakki aro lekkarang gride gong lak 50-na bate tangkarangko ra·bitna on·jaengachim.