Constituency-tangni ja·manchakaniko nikna sikjae NPP-o napa: Marthon

Tura: North Garo Hills-ni gipin constituency-rangode namroro-silroroaha uni constituency-o namroro-silroroani komiani ba dongjani gimin Conrad Sangma-ni dilenggipa NPP-o napani ja·pangde ong·aia unigimin  ua chakatengkua, Mendipathar-oni changgnina MLA ong·gipa Marthon J Sangma aganaha.
“Angko NPP-o napchina didigipa angni chakpagiparang aro sepanggipa nokdangni manderang baksa ru·uten chanchigrikani ja·mano anga NPP-o napaha indake 2023-o a·dokko namdapatna cholko man·taigen. Opposition MLA ong·ede a·jolko namdapatna bang·gija tangka-paisarangko man·aia, maina bang·bata somairango kamko ka·na MLA scheme-rangkosan man·aia,” Marthon aganaha.
Election-ko parakatani ja·mano Marthon official-ni gita adita jarangna skango NPP-o napaha.
“NGH-o constituency ge·antion NPP MLA-rangchi dilenga uamangni kona-noksikona bang·a namdapani project-rangko nikna gita man·engaha. Kharkutta-o gipin gipin namdapanirangni gisepo rama-sorokrang, stadium ge·sa, CHC dongaha, aro Bajengdoba-oba stadium, bang·a rama-sorok project-rang aro gimikni gitan namdapanirang dongaha. Resubelpara-oba apsan namdapaniko man·aha. Anga NPP-o napani ja·mano angni constituency-na adita mongsonggipa project-rangko on·atna CM namnikaha. Uarangko kam ka·engaha,” Marthon aganaha.
MLA ong·e uni kam ka·ani gimin aganao constuituency-ni dilgipa ong·e skango ong·anggipa pilak MLA-rangna baten ua  kam ka·bataha, ua aganaha.
“Angna skang scheme-rangko kam ka·giparangko nibo, lekkaosanmangmang bang·a project-rangko kam ka·ako na·simang nikgen jekon ge 50-na baten community hall-rangko rikna anga dakchakaha, ge 60 a·a gamani machine-rangko suale on·angaha, neng·nikani somaina bol 4 ambulance garirangko on·ate manderangna dakchakani ong·aha. Ia chu·sokanirango skango ong·gipa MLA angko tosusana man·jawa,’’ NPP dilgipa aganaha.
Garo Hills a·jolo NPP-ni kam ka·a namen namenga aro party a·doko dolsan bang·bate chu·sokgipa ong·na nidinenga, Marthon aganaha.
“A·doko party ge·san seat-rangko bang·bate man·a chingni party namen chol dongenga. Bang·bata somaion opposition-o donggenchimoba MLA ong·e anga kam ka·ani gimin anga chena gita chol donga. Angni kosako susagipa pilak candidate-rang political a·bao gitalrang ong·a indake chingna chol ong·batgen,” Marthon aganaha.
NPP, TMC-ni Pardinand D Shira, Congress-ni Timjim Momin, UDP-ni Subroto Marak uandake biming mingkugijagipa BJP-ni candidate-ni kosako susagen. TMC aro BJP gittamgipa changna Mendipathar-o uni tarisoanirangna dal·batgipa ra·biani ong·gen.