TURA: Ong·nasienggipa election-rango aro sorkariko riknaba party ge·san bang·bate seat-rangko man·gen, Bajengdoba-o 2018 bilsiona bate bang·bata vote-rangchi chegen ine NPP-ni da·o Bajengdoba-ni MLA ong·enggipa Pongseng Marak ka·donge aganaha.
“NPP Bajengdoba-o chechongmotgen aro 2018-ona baten bang·bata vote-rangchi chegen. Bajengdoba-osan ong·aija indiba pilak a·jolrangon chinga raken kamko ka·enga aro chinga party ge·sanchi re·baenggipa sorkariko rikna man·gen,’’ ua aganaha.
Ua chebaode uni mongsonggipa nisan constituency-ni ning·o bang·a neng·nikanirangko nianggen jerangkon batanggimin bilsi bongao chu·sokatna man·jachim uarangko chu·sokatgen, da·o ong·enggipa MLA aganaha.
“College-rang dongjae chadamberang uamangni lekka-pora skie ra·anirangko neng·nikanirangko chagrongna gita nangenga. Constituency-oni poraigipa chatro-chatrirang Mendipathar College-osan pangchakaia aro uamang re·a-doani aro gipin gipin nanga korosrangna bang·a neng·nikanirangko chagrongenga. Anga chebaode angni skanggipa dakgnide Bajengdoba-o college-ko songanian ong·gen,’’ ua aganaha.
Batanggimin bilsi bonga bilsimitingo constituency-ni ning·o dil 15 gitalgipa rama-sorokrangko tariaha aro taridapna nangenga jeon bilona re·bapilode uarangko niatgen ua Marak ku·rachakaha.
Covid-19 lockdown-ni a·sel uamangni somaio uamangni chu·gimik bilmitingo bilsi gittamsan uamang manderangna kam ka·na man·aiaha indiba ua somaio Chief Minister Conrad Sangma-ni dakchakanichi namdapani kamrangko ka·na gita man·aha, ua aganaha.
“Bang·a a·jolrango galchipgipa skulrangko chinga rikpiltaina aro uamangni biaprango gitalgipa skul nokrangko rikna gita man·aha. Kal·susaanirango chadamberangna ga·timrarang dongna gita stadium-rangko rikna chinga man·aha. Constituency-ni ning·o bang·a biaprangon gitalgipa nokrangko rikan baksana nosto ong·gipa sub-centre-rangkoba rikpiltaina gita chinga man·aha,” Marak a·kangaha.
Gipin party-nirangni bidingo aganao NPP-ni nirikani gita TMC aro Congress dolgnini bilakani apsan gadangon ong·enga aro darangba uamangko on·chepe-mikchepe ra·na gita man·jawa, MLA aganaha.
