SHILLONG: A·doko political-ni bilko dingtangatna gitalgipa ja·ku de·anio Congress candidate Augustine D Marak, TMC candidate Rupa Marak-ni gimin chanchie uni susaana miksonganiko walpilna chanchiaha.
Dadenggre assembly constituency-oni Health aro Family Welfare Minister James Sangma-ko ganggilatna ua man·aigen, Augustine aganaha.
“Ong·nasienggipa election-rango susana anga chanchijaha aro be·enni gita neng·nikanirang donganichi Congress-ni a·bachenggipa membor ong·aonikoba anga wataha,” Marak aganaha.
“Da·o anga susajawaha anga Rupa-na chakpagen. Anga maming saloba NPP-na chakpajawa. James, NPP candidate-ko ganggilatna anga nangnikenga aro angni katta gitan James ronggalgen,’’ ua aganangkuaha.
James, Chief Minister Conrad Sangma-ni adatang dal·batgipa ong·a. Ua West Garo Hills, Dadenggre assembly constituency-oni chang gittam changrangna Meghalaya Legislative Assembly-o seokako man·aha.
Ua kattarangko knae ong·nasienggipa Assembly election-rango susana sikgijaniko parakgipa Marak-ni chanchiani bidingo party namnikgija ong·ja ine Meghalaya Pradesh Congress Committee chief Vincent H Pala aganaha.
“Party-oni watna aro election-o susajana uni miksongani bidingo anga ma·sia,” Pala aganaha.
Uni biapo ua seat-o sakgipin candidate-ko party susaatgen ine ua aganaha.
Party tikkit-oni susachina gitcham minister-ko party agana dongja, ua aganaha.
“Party tikkit-na dorkastoko on·gipa Marak-an ong·achim. Party maming gimaani dongja,” MPCC chief agandapaha.
February 27 tariko sak 60-member Meghalaya Assembly-na election-rangko ong·atna sal manchiaha. Vote-rangko March 2-o changen.
