SHILLONG: Re·anggipa Robibar salo, Bangladesh a·songona niam gri palsrukatna gita ra·angenggipa mang 25 matchurangko 4 Battalion BSF-ni sipairang, East Khasi Hills a·jani simaoniko rim·rikna man·aha.
BSF-oni koborko on·ani gitade, a·song damgnini gisepo niam gri bading chiwalenggipa manderangni adita matchurangko buring gita a·song damgnini simaona ra·angengmitingko 4 Bn BSF-ni sipairang nikrikenba, matchu moangenggipa manderangko rim·na rikangon, ia manderang an·tangtangni moangenggipa matchurangko ua biapon gale kataha.
“Niam gri matchu badinggipa manderang, India a·songni matchurangko Bangladesh a·songona palsrukatna gita pangnan dikbegipa buringrangosa dongnue donronga aro chol man·ahaon uamang, kolgipurang gita matchurangko Bangladesh a·songona watatronga. Indiba ia sal somoirango BSF-ni sipairang mikrake kamrangko ka·engani gimin niam gri badingatenggipa matchurangko bang·en rim·na man·enga,” ine BSF official parakataha.
A·song damgnini simarango ong·gija dakgipa kamrangko warachakna kam ka·anio BSF sipairang, 2022 bilsini gisepon mang 3481 matchurangko rim·na man·aha ineba BSF official parakataha.
