SHILLONG: A·doko Assembly-na lekka puonani ong·na am·enggipana HSPDP Bristibar salo ming 27 manifesto-ko nakatataha.
Article 371 Constitution-o pangchake Khasi-Jaintia-ko bikotna party-ni mongosnggipa chubatgipa gadango dabiani ong·angkugen ine party-ni manifesto-ko nakatatani ja·man HSPDP-ni president KP Pangniang aganangaha.
“Chinga sorkarini bak ong·a ong·ode, namgipa sorkariko rikgen aro sorkario tangka cha·boka gri ong·atna chinga ra·bana ku·rachaka. Jensalo sorkarini dingtang dingtang department-ni gita kamrangko on·angna re·baa a·dokni songdonggiparangni gisepo maming neng·nikani ba jajaani dongatjana chinga ka·donganiko on·a,” ine Pangniang agananga.
A·doko niamgri songdonggipa aro napdrapagiparangni bidingo neng·nikani baksa namgipa kragipa mechanism-ko biapo donjaskal da·alona a·dok sorkarini railway-ko ra·bana am·aniko party jegalaniko dakangkugen ine HSPDP-ni president agananga.
“A·doko uranium mining-na je proposal-ko ra·baoba chinga jegalangkugen. Aro Assam a·dok baksa ruuta somoioni sima ari jolo bak dakani dongkuenggipa neng·nikaniko namate on·a nanganio chinga sorkarini kosako bilake jingjengatanirangko dakangkugen,” ine ua agananga.
Uni parakatani gitade, jensomoio sorkarini dingtang dingtang department-rango gapatna nangenggipa post-rango rakkiangani sokbaon nikjokgipa kamrang ong·na nanganio manderangna kam ka·anggen.
“Chinga job reservation-ni bidingo nipilaniko dakangna sudodogen jeon batanggimin bilsi 50-na chalaibaaha. Job Reservation-ko namdapatna ian somoi ong·engaha,” ine Pangniang aganangaha.
A·doko ILP-ko chu·sokatna ma·mongni kam ka·anina resolution-ko assembly-o ra·chakani gita ja·ku ga·angna am·anina party namnikangaha, ine HSPDP president aganangaha.
