SHILLONG : TMC-ni dilgipa Mukul Sangma butbar salo manderangna aganmitingo indake aganaha, NPP party-de BJP-ni B team ong·a. Uni aganani gitade batanggipa 2018 bilsio Delhi-oni BJP minister-rang aro Assam-ni minister-rang Shillong songjinma-ona sorkariko rikna gita re·baaha.
“Ian Conrad Sangmako sorkarini bilona sokatgipara BJP-sa ong·aha ine mesokaha” ine TMC-ni dilgipa aganaha.
MDA sorkariko tangka cha·a ine matnange aganengon ua aganaha a·dokni manderangna MDA sorkari mamingkoba dakjaha, “Chinga Congress-o ong·mitingoba manderangni dakchakanirangko ba vote ka·anirangko man·aha, sorkariko rikgipa NJP-NPP-sa ong·skaaha.
“Bil baksa singhasono sawa asonggen saoba ong·gen, uni gimin chinga apsan ka·ako man·a aro singhasono asonggipa saobako tanggalatna ku·cholsan ong·na nanggen.’’ ua aganaha.
“Democracy-o manderang uamangni bil-rengsiko aro bilrangko ma·siode ong·gijagipa dilgipako baseaniko uamang bon·atna man·gen iako gisik ra·na nangchongmota. Democracy-ni mongsonggipa ong·aniko aro ku·cholsan ong·aniara bilakbata ine chinga ma·sina nanga,’’ ua agandapaha.
Tom·ao tom·dakgipa manderangni gisepo sakanti kusi ong·enga, re·anggipa walo anga phone ka·atako man·soaha aro da·alni tom·aosan anga dongna man·aia ine aganataha. Indiba ge·gni meeting-rangko ong·atna manchiaha. Ua ge·gni meeting-rang angna apsan gamchata aro da·alo anga jeko nikenga ku·cholsan ong·aniko gamchatnikaha. Ian ra·chaktogipa ong·a,’’ opposition dilgipa aganaha.
South Garo Hills Baghmara aro West Khasi Hills Rambrai-Jyrngam-o ge·gipin ge·gni rally-rango TMC dilgipa aganaha.
Baghmara kam gri ong·e neng·nikako man·ani gimin ua aganao a·doko kam gri ong·ani ari gri ong·enga. Engineer ong·giparang aro first class ong·e MSC pass ka·gipa chatro-chatrirang chadamberang contractual skigiparangni kamnasa galenga,’’ ua aganaha.
“Maikai Conrad sorkari kala, ku·ma aro mikri ong·ako chinga nikenga, Meghalaya-ni chadamberangna maming aganchaka dongja. 4-5 contractual skigiparangni kamna sak 1,000-mang manderang galenga. Ian a·dokni gimin namen dukni ong·a,’’ ua agandapaha.
Ku·cholsan ong·na aro nangrime kam ka·na manderangko didie Mukul matchotataha, democracy-o bakko ra·ani altua kam ong·a, Bilakgipa chingna chingni bil-rengsirangko on·aniko an·ching jakkalna nanga. An·chingni a·bri jat ong·aniko skanggipa done mikkangchi nambatana an·ching ku·cholsan kamko ka·na nangchongmota.”
Rambrai-Jyrngam-o, democracy-ko bilakbatatna ku·cholsan ong·na nangani gimin agane Mukul gisik nanganiko manderang nikenga.
A·dokna uni party-ni niksamsoanikoba ua aganaha aro a·doko silroro-namroroaniko ra·bana Meghalaya-na TMC-ni ming 10 ku·rachakanirangko manderangna agan-u·iatjolaha.
