SHILLONG: Ia bilsini Assembly election-oba darang political dolan, seat-rangko chegopna man·jawa ine Sukrobar salo, Meghalaya Trinamool Congress (TMC)-ni president Charles Pyngrope parakataha.
Iani bidingo kobor ra·timgipa manderang baksa agangrikengon, ia election-o TMC dolba bang·bate seat-rangko chena rakbee kamrangko ka·engachim ine Pyngrope parakataha.
Indake ong·genchimoba, batanggimin chang election-rango ong·ronga gitan darang political dolba seat-rangko chegopnade man·jawa ine Pyngrope parakataha.
Pyngrope-ni aganani gitade, 1998 bilsi dipetan Meghalaya a·doko seat-rangko chegopaniara political dolrangna neng·begipa kam ong·engachim.
Iani bidingo toe janapatengon, 2013 bilsini Meghalaya Assembly election-o Congress dol, dam 29 seat-rangko chee bilko ra·piltaina man·aha indiba seat damgni komikuenba dolsanchide bilrang chu·ongjahachim ine TMC-ni state president parakataha.
“Iako aganengon ian ong·na man·jawa inede anga aganjaenga maina 2008 bilsini Assembly election-oba Congress dol, dam 25 seat-rangko cheaha,” ine ua aganaha.
Ia chang Assembly election-o dam 31 seat-rangko chena TMC krengenge ineba Pyngrope parakataha.
“Ia pilakan manderangosa pangchakaigen aro iako chinga senge nina nangkuenga. Je constituency-rangon chinga candidate-rangko susaatengachim, ia pilak constituency-rangon chingna cholrang namenga,” ine ua aganaha.
Indake ong·engon, TMC-ni niksamsoani aro bebera·ani gita apsan daken chanchigipa dolrang baksa uamang mikkangchi bakrime kamrangko ka·ani cholrang donga ineba TMC-ni state president parakataha.
“Chinga UDP, HSPDP aro PDF dolrang baksa bakrimna neng·nikani dongjawa aro je dolrangan chingni nangnikani aro miksongani gita kamrangko ka·na kusi ong·genchim, chinga uandakgipa dolrang baksa bakrimna kusi ong·aigen,” ine Pyngrope aganaha.
Comments are closed.