SHILLONG: Re·baenggipa February-ni 27 tariko ong·atenggipa Meghalaya Legislative Assembly election-o United Democratic Party (UDP), dam 8 ba dam10-na bate seat-rangko chena man·jawa ine Sombar salo, UDP-ko bikotdilchenggipa membor-rangoni saksa Bindo M Lanong parakataha.
Ia chang Assembly election-o Nongkrem constituency-oni susana gita una UDP-ni tikitko on·jahani gimin ua Independent candidate ong·e apsan constituency-on susaskaengachim ine nikna man·a.
Bading chiwale cha·gipa manderangsa political dolrango napgenchimode iandakgipa obostarang ong·aigen ineba Lanong, UDP-ni president Metbah Lyngdoh-ni kosako matnange aganaha.
Indake ong·genchimoba, election-ni ja·mande ua UDP-ona re·bapilaigen ine Lanong parakataha.
UDP-ko bikotdilchenggiparangoni Bindo Lanong-ba saksa ong·achim indiba ia chang election-o Nongkrem constituency-oni susana gita una UDP-ni tikitko on·gija, kamtangko watanggipa MLA Lambor Malngiang-nasa on·skaahachim ine nikna man·a.
