TURA: Re·baenggipa February-ni 27 tariko ong·atenggipa Meghalaya Legislative Assembly election-na Garo Hills-ni dambonga a·jarango candidate-rangni nomination file ka·gipa lekkarangko Budbar salo scrutiny ba nipiltaiangahaon, Garo Hills-ni dambonga a·jarangon candidate saksaba jegalaniko man·jaha ine koborko man·soaha.
Garo Hills gimiko dam 24 Assembly constituency-rang donga aro ia dam 24 Assembly constituency-rangoni dam 11-de West Garo Hills-o, dam 4-de North Garo Hills-o, dam 3-de South West Garo Hills-o, dam 3-de East Garo Hills-o aro dam 3-de South Garo Hills a·jao ong·engachim.
Garo Hills gimikni dam 24 Assembly constituency-na gimik sak 142 candidate-rang nomination-ko file ka·ahachim aro ia sak 142 candidate-rangan scrutiny-ko ka·anio chu·sokgiparang ong·aha ine kobor on·aha.
West Garo Hills a·jani dam 11 Assembly constituency-rango me·chik candidate sakbriko man·chape gimik sak 69 candidate-rang nomination file ka·aha aro sak 69-oni darangba jegalako man·jaha.
North Garo Hills a·jaoba dam 4 Assembly constituency-rango gimik sak 24 candidate-rang, South West Garo Hills a·jani dam 3 Assembly constituency-o me·chik candidate sakgittamko man·chape gimik sak 12, East Garo Hills a·jani dam 3 Assembly constituency-o me·chik candidate sakgniko man·chape gimik 16 aro South Garo Hills a·jani dam 3 Assembly constituency-o gimik sak 16 candidate-rang nomination-ko file ka·skaaha aro uamang pilakan scrutiny-ko ka·anio chu·sokgiparang ong·aha.
Nomination-ko ra·pilani bon·kamgipa tarikara February-ni 10 tarik attam 3:00 bajiona ong·skaengachim.
