NONGPOH: Mijal February 8 tariko Ri-Bhoi district-ni 18th Mile, Byrnihat-o mingsa dal·gipa tom·aniko ong·atao, 10-Jirang Constituency-ni candidate Adrian L Chyne Mylliem-na chakpaaniko on·na gita National Peoples Party (NPP), United Democratice Party (UDP) aro Bharatya Janata Party (BJP)-ni dilgiparang Congress party-ona bakrimetokaha.
Koboro gita, BJP-ni niksenggipa dilgiparang 18mer-ni Riang Pohtam, Bisida Sumer aro UDP-ni dilgiparang 18mer-ni Balaai Suting, Antipas Bina aro Patharkhmah-ni, Boney Wick Marwein mangko man·chape gipin dilgiparang Congress-o napeaha.
Unomitingo, “18th Mile-ni NPP dilgiparang Shaniah Pohswet, Maxi Marak, Pynskhem Sumer mangko man·chape aro ba Patharkhmah-ni, Morning Marngar, 15 Mile-ni Jenewel Khongkliam aro gipin gipin dilgiparang Congress party-o bakrimeaha.
Unigisepon, “NPP, UDP aro BJP-ni gipin niksenggipa dilgiparangba re·baenggipa antirango Congress party-o napnasigiparang dongkuenga’’ ineba parakataha.
