TURA: Meghalaya Legislative Assembly election-ko re·baenggipa February 27 tariko ong·atna siengon, Mongolbar walo, Trinamool Congress (TMC) dolna kam ka·enggipa dolsa manderangko ma·sina man·gijagipa manderang, West Garo Hills a·jani Phulbari constituency-o chadrapaha aro ia a·sel ong·anio TMC-na kam ka·enggipa adita sak manderang aro gipinrangba saknaanirangko man·na nangaha.
Ia a·selni bidingo TMC dolni dilgiparang, National People’s Party (NPP)-ko matnangataha.
TMC-oni koborko on·ani gitade, Mongolbar walo, TMC dolna kam ka·enggipa adita sak manderangko NPP-na kam ka·enggiparang, Phulbari constituency-ni Charbatapara jolo chadrapaha.
Ua somoio TMC dolni tom·aniko Charbatapara booth-o ong·atengachim aro walni 10:30 bajimango NPP-na kam ka·enggipa manderang ua biapona re·baenba, TMC-ni tom·enggipa biapko chadrape nosto ka·aha aro TMC-na kam ka·enggipa manderangko chadrapaha ine TMC-ni dilgiparang matnangataha.
Ia a·sel ong·anio bilsi 59 ong·gipa Nozrul Hoque, bilongbee saknaanirangko man·aha aro uko ja·mano TMC-ni manderang, sambao donggipa Phulbari CHC-ona ra·angaha ineba TMC-ni dilgiparang u·iataha.
