SHILLONG: Bharatiya Janata Party (BJP)-ni ‘dongnugipa aro chalakki dakgipa’ miksonganirangna mikrake dongchina gita Bristibar salo, Opposition Trinamool Congress (TMC)-ni dilgipa Mukul Sangma, Meghalaya a·dokni manderangko didiataha.
“A·songni jakgitelaniko man·ani ja·man Meghalaya-o Sixth Schedule, Nagaland-o Article 371 aro Jammu & Kashmir-o Article 370-ko man·chape dingtang dingtang a·dokrango dingtang dingtang niamrangko ra·gatahachim. Manderangni daka rikani aro janggi tangani bewalko chel·chakna gitasa ia niamrangko on·ahachim indiba Kashmir-na ra·gatgipa Article 370 mai ong·aha?” ine Mendipathar constituency-o jinmana aganprakengmiting somoio Mukul sing·doangaha.
Manderangni jajrengchakenggipa kamrangni gimin janapatengon, “Delhi-o ma·mong sorkari, an·tangtangni nangnikanirangko chu·sokatna gita Article 370-ko ra·galaha. Ia niamara Tribal manderangna an·tangtangni a·arangko chel·chakna on·gimin niam ong·e gipin biaprangoni manderangko re·bae ra·sekaniko champengengachim. Indiba Modi-chi dilenggipa BJP sorkari, manderangni nangnikani gita ong·gija kamrangko ka·aha aro ia somoio Kashmir-ni gitcham chief minister-rangko man·chape bang·a dilgiparangkon rim·aha. Uni giminsa an·chingba ku·cholsan ong·e iandakgipa kamrangna mikraksona nangenga,” ine Sangma parakataha.
BJP-ni kosako a·dokni chief minister Conrad Sangma, chakatna ka·donggenma ine sing·doatengon, a·doko manderangni ku·cholsan ong·e janggi tanganiko ma·ekatna jotton ka·gipa dolrangko warachaksona gita a·dokni manderang da·o ku·cholsan ong·na nangengaha ine TMC-ni dilgipa aganaha.
Bajengdoba constituency-oba TMC-ni tom·anio TMC-ni dilgipa, manderangna aganprakangaha, jeon ua Conrad Sangma-chi dilgipa MDA sorkarini chu·sokgijanirangko aganangaha.
“India a·songo skanggipa changna Meghalaya sorkari, skigiparangko kamo rakkijahani a·sel poraienggipa bi·sarang, bida budirangko man·jaha. Ia sorkarini miksongmanchae kamko ka·ahani a·selan songadam nokadamrango skulrangko chipna nangaha aro bi·sarang lekka pora gri ong·na nangtokaha,” ine Sangma aganaha.