Songsak-ko namdapatani bidingo changsaba sorkari baksa agangrikja ine Conrad, Mukul-ko matnanga

TURA: East Garo Hills a·jani Songsak constituency-o namroro silroroatani kamrangko ra·baani bidingo Songsak MLA Mukul Sangma, changsaba sorkari baksa agangrikjahani a·sel ia constituency-o namroro silroroani kamrangko bang·e ra·bana man·jaha indiba ia chang National People’s Party (NPP)-ni candidate ong·e susaenggipa Nihim D Shira, Songsak-o dingtang dingtang nangchongmotenggipa kamrangni gimin agangrikahani giminsa namroro silroroatani kamrangko ra·bana man·aha ine Bristibar salo, a·dokni Chief Minister aro NPP-ni national president Conrad K Sangma parakataha.
Bristibar salo ua, Songsak constituency-ni Dagal songo, NPP-ni candidate Nihim Shira-na campaign ka·engmiting somoio ia kattarangko aganaha.
Songsak constituency-o NPP-ni candidate-na campaign ka·anganio Assembly-ni Deputy Speaker Timothy D Shira-ba dongpae bak ra·angahachim.
Bilsi bongana NPP-ni dilanichi sorkariko chalaianio dingtang dingtang neng·nikanirangko aro mongsongbate COVID-19 sajinmani a·sel bilsigni batpile kamrangko name ka·na man·jahaoba a·doko namroro silroroaniko ra·bana gita uamang rakbee kamrangko ka·aha aro bang·a kamrangkon chu·sokatna man·aha ineba Conrad aganaha.
“Batanggimin bilsi bongani gisepo ia sorkari, bilsi 20 ba 30-ni gisepo chu·sokatna man·gijagipa kamrangkon chu·sokatna man·aha. A·dok gimikon NPP sorkari, bang·bea rama jal·langrangko tarie on·aha,” ine ua aganaha.
Bilsi bongana skang, a·doko te 4500-mangni gita nokdangrangsan songadam nokadamrango chi pipe-rangko man·engkuachim indiba batanggimin bilsi gittamni gisepon NPP-chi dilenggipa sorkari, lak 3 nokdangrangna baten chi pipe-rangko sokate on·na man·aha ineba NPP-ni national president parakataha.
Ia sorkari, a·dokni constituency ge·antion namroro silroroaniko ra·bana gita MLA sakpraknan bilko on·aha ine janapatengon, “Chingni MLA-rang pilakan an·tangtangni constituency-rangode chief minister-rang gitan ong·aia. An·tangtangni constituency-o nangani kri namroro silroroaniko ra·bana gita kamrangko ka·na chinga uamangna bilko on·aha,” ine Sangma aganaha.